Kiwi's sê nee vir 'geen seks'-veldtog
2011-08-17 13:07
Wellington – Die All Blacks bevind hulle midde 'n omstrede bemarkingsveldtog wat ondersteuners aanmoedig om 'nee te sê vir seks' tydens vanjaar se Wêreldbeker-toernooi.
Dié inisiatief, wat deur Nieu-Seeland se Telecom-diensverskaffer aangevoer word, doen 'n beroep op All Black-ondersteuners om hulself van seks tydens die Wêreldbeker te weerhou.
Volgens berigte is die Nieu-Seelandse rugbyunie (NZRU) geïrriteerd met die veldtog, alhoewel die unie Dinsdagaand 'n verklaring uitgereik het wat dit ondersteun.
"Abstain for the All Blacks" skop volgende week op die All Blacks se ondersteunerswebtuiste BackingBlack af.
Die veldtog sal deur die voormalige All Black-kaptein Sean Fitzpartrick gelei word en deelnemers sal swart rubberringe dra om te wys dat hulle die inisiatief ondersteun.
Volgens 'n meningspeiling oor die beplande veldtog het 92% van die meer as 14 000 stemme gesê: 'Jy maak seker 'n grap,' teenoor 8% wat meen dit is 'n goeie idee.
Organiseerders hoop dat dié veldtog Nieu-Seelanders op dieselfde manier sal inspireer as wat Sir Peter Blake se rooi sokkies dit destyds tydens die America's Cup reggekry het.
Maar 'n bemarkingspersoon wat bekend is met die inisiatief het gesê Telecom se advertensie-agentskap, Saatchi & Saatchi, wou hê dit moes omstrede wees.
Hy het aan die Herald gesê: "Dis 'n vernedering. Die res van die wêreld gaan vir ons lag."
Plakkate sou oorspronklik in publieke kleedkamers opgeplak word wat sê: "dink aan jou ma in 'n bikini – sê nee vir seks." Maar die plan is toe later laat vaar.
Telecom se direkteur van bemarking, Kieren Cooney, het gesê die nuwe veldtog is bedoel om "tong-in-die-kies" te wees.
Lees verder.
Vir die jongste sportnuus volg Nuus24Sport op Twitter.
– NZH