Kiwi's blameer losskakel vir nederlaag
2010-11-01 12:34
Wellington - Die messe is in Nieu-Seeland uitgehaal vir die plaasvervanger-losskakel Stephen Donald, wat die sondebok gemaak is in die All Blacks se nederlaag van 24-26 teen die Wallabies in Hongkong.
Voormalige All Black-spelers, Sean Fitzpatrick en Richard Loe, het die meeste oor Donald se vertoning in die Bledisloe-toets te sê gehad.
"Stephen Donald, ek's jammer om dit wéér te sê, is net nie All Black-kwaliteit nie, het Loe in sy Herald on Sunday-rugbyrubriek gesê.
Fitzpatrick het gesê Donald het dalk op provinsiale vlak vir Nieu-Seeland uitgeblink. "Maar toetsrugby is 'n groot stap na boontoe. En ek dink hy het tekort geskiet," het die voormalige kaptein gesê.
Die toets in Hongkong het 'n einde gebring aan die All Blacks se onoorwonne 15 wedstryde na mekaar.
Na 'n stadige begin waar hulle met 0-12 agter was, het dit gelyk asof die All Blacks die toets gewen het met die telling skielik 24-12 en 15 minute speeltyd oor.
Breier Graham Henry het het die ster-losskakel Dan Carter in die 60ste minuut met Donald vervang en dit is toe dinge begin skeefloop het. Carter was skaars van die veld toe vleuel Drew Mitchell 'n drie gedruk het om die telling 24-19 te maak.
Met tyd amper verstreke het Donald met 'n maklike strafskop misluk. Kort daarna het hy 'n bal wat vir die kantlyn bedoel was nie uitgeskop nie. Dié fout het die Wallabies met 'n teenaanval laat begin en uiteindelik in die wendrie geëindig.
"Dit het alles met druk te doen. As Donald nie tyd en spasie gegee word nie dan sukkel hy," het die radio-omroeper Murray Deaker gesê.
Fitzpatrick het gesê dit is duidelik dat die All Black-keurders nog nie 'n geskikte plaasvervanger vir Carter gevind het nie. Hy was ook verbaas dat jong spelers soos Colin Slade en Aaron Cruden nie gekies is om saam met die All Blacks te toer nie.
Die joernalis Gregor Paul het in die Herald on Sunday geskryf dat daar definitiewe ooreenkomste tussen Saterdag se wedstryd en die All Blacks se nederlaag teen Frankryk in die kwarteindronde van die 2007 Wêreldbeker was.
"In daardie laaste paar minute was dit moeilik om nie terug te dink aan Cardiff drie jaar gelede nie. Die All Blacks onder druk en nie in staat om helder te dink nie," het Paul geskryf.
Bly op hoogte van al die jongste sportnuus deur Nuus24Sport op Twitter te volg.
- Sport24