Kings kry dalk nie vir Michael Claassens
2010-12-20 12:22
Port Elizabeth - Die kans dat die Oostelike Provinsie-Kings daarin gaan slaag om die voormalige Springbok-skrumskakel Michael Claassens Baai toe te lok, word al hoe kleiner.
Claassens het Saterdag sy gewone goeie, vurige spel vir sy Britse klub, Bath, in die Heinekenbeker-rugbyreeks teen Ulster gelewer.
Ulster het dié kragmeting, waarin die Bok-losskakel Butch James met ’n geelkaart afgestuur is, met 26-22 gewen.
James is gepos toe hy by ’n onderonsie tussen Claassens en Ulster se kaptein, die oud-Springbok-slot Johann Muller, ingemeng het.
Hoewel die Kings sterk na Claassens vry, het Bath se bestuur aangedui dat alles moontlik gedoen sal word om dié skrumskakel te behou.
Bath het reeds die omstrede losvoorspeler Luke Watson aan die Kings afgestaan en James is glo op pad na die Lions.
Die Engelse losskakel Jonny Wilkinson is op sy beurt volgens Sapa-AFP glo op die punt om sy kontrak met sy Franse klub, Toulon, tot 2013 te verleng.
Toulon het London Irish Saterdag met 38-17 kafgedraf, maar Wilkinson het ’n ruskans gekry.
In sy afwesigheid het die Argentyn Felipe Contepomi as losskakel uitgeblink.
Hy het ’n drie gedruk en 13 punte met die skoen aangeteken.
In die kragmeting tussen Llanelli en Treviso kon Willem de Waal nie verhoed dat Treviso met 15-38 verloor nie.
De Waal kon net ’n strafdoel en ’n doelskop behaal.
Brendan Venter, Saracens se eksentrieke afrigter, het intussen vir ’n verandering ’n sinvolle onderhoud met joernaliste gevoer ná sy span se oorwinning van 19-14 Vrydag oor Racing Metro.
“Dit was ’n goeie eerste helfte vir ons, maar ons was in die tweede helfte nie takties so skerp gewees nie,” het hy aan Sky Sports 3 gesê.
“Dit was oor wie die beste in die toestande (sneeu) kon speel en in die eerste helfte het ons dit baie goed gedoen.
“In die tweede helfte het ons twee sagter drieë afgestaan, maar die manne het briljant gedoen deur voort te veg,” aldus Venter.
- Volg Nuus24 Sport op Twitter.