Kings katrol nog groot visse in
2010-09-07 07:58
Port Elizabeth - Die voormalige Lions- en Leeus-slot Willem Stoltz sal dalk al so gou as Vrydagaand vir die rugbyspan van die Oostelike Provinsie-Kings speel.
Die Kings speel hier in die Nelson Mandelabaai-stadion teen die Boland-Kavaliers in ’n wedstryd in die Curriebeker-reeks se Eerste Liga.
Stoltz (35), wat 2.08 m lank is en 115 kg weeg, is ’n ervare kalant wat al byna 200 provinsiale wedstryde gespeel het.
Hy het gister in nat weer saam met sy nuwe spanmaats geoefen.
Dit het gelyk of hy Lungelo Payi se slotmaat teen die Kavaliers kan wees met een van Brendon Snyman en Nolan Clarke wat as die plaasvervanger-slot gekies kan word.
Snyman het twee weke gelede na vore getree as die beseerde Rory Duncan se plaasvervanger.
Of Stoltz dit kan doen, moet nog gesien word.
Hy was lank laas in aksie, maar dat hy ’n teenwoordigheid op die veld het, kan niemand oor stry nie.
Nog ’n nuwe gesig by die oefening was dié van die losskakel Len Olivier.
Olivier, wat al vir die Blou Bulle, Valke en die Haaie uitgedraf het, sal dalk as ’n plaasvervanger kans kry.
Die vurige flank Jacques Potgieter sukkel met ’n ligte skouerbesering, maar behoort reg te wees om die Kavaliers te pak.
Mpho Mbiyozo oefen ook weer voluit nadat hy verlede week met seer ribbe gesukkel het.
Intussen het een van die mees swak bewaarde geheime gister op die lappe gekom toe daar op facebook daaroor berig is.
Dit is dat die Blou Bulle se kaalkop-voorryman Jaco Engels in 2011 vir die Kings kom speel.
Engels was juis die naweek een van die Bulle se groot uitblinkers teen die Haaie. Hy het onder meer ’n drie gedruk.
Hy het verlede jaar vir die Southern Kings, wat deur Solomons afgerig is, teen die Britse en Ierse Leeus gespeel en toe is daar al uit OP-bestuursgeledere die wens uitgespreek dat hy Baai toe kan verhuis.
Solomons se lippe is, soos altyd oor sulke sake, gesluit.
Bly op hoogte van al die jongste sportnuus deur Nuus24Sport op Twitter te volg.
- Sport24