Kings het berg om te klim
2012-10-25 12:25
Port Elizabeth – Die OP Kings hoop om te bewys dat hulle saam met die groot kanonne kan speel deur ‘n massiewe agterstand uit te wis wanneer hulle Vrydag teen die Vrystaatse Cheetahs in die tweede promosie-relegasie-wedstryd uitdraf.
Alan Solomons, die Kings se direkteur van rugby, het gesê dat sy span steeds vol vertroue is dat hulle volgende jaar in die Curriebeker se topdivisie kan speel.
“Hierdie is ons kans om te bewys dat ons dat ons daar bo behoort,” het Solomons gesê.
“Ons het te veel foute in die eerste wedstryd gemaak en dit het die Cheethas die kans gegee om die punte in te ryg.”
Solomons het ook gesê dat die Kings, wat volgende jaar Super-rugby gaan speel, dieselfde benadering deur die Cheethas verwag.
Die Cheethas het die Kings 53-14 in Bloemfontein vermorsel.
“Ons weet dat hulle weer ‘n kragvertoning wil lewer, maar ons weet ook dat ons die ondersteuners in die eerste wedstryd in die steek gelaat het.”
“Ons het hard gedurende die week gewerk en hopelik kan ons ‘n sterk vertoning lewer.”
Die Cheetahs het ‘n volle vyf liga-punte in die eerste wedstryd aangeteken.
Dit beteken die Kings het ‘n berg om te klim as hulle die promosie-relegasie-stryd wil wen. Hulle sal met 40 punte moet wen, en sal ook vyf drieë moet druk en verseker dat die Cheethas nie ‘n bonuspunt kry nie.
Die Cheetahs hou egter vol dat hulle nie nou die voet van die pedaal sal afhaal nie.
“Dit is hoekom ons Rayno Benjamin in die beginspan ingesluit het,” het Naka Drotské, afrigter van die Cheethas, vroeër die week gesê.
“Hy het baie goed op die aanval gelyk tydens die eerste wedstryd en het ‘n groot impak van die bank af gemaak.”
“Die idee is om soveel drieë as moontlik te druk.”
– Vir die jongste sportnuus volg Nuus24Sport op Twitter.
- SAPA
