'Kings en Cheetahs sal nie saamsmelt'
2011-11-28 10:01
BLOEMFONTEIN. – Die Cheetahs se kanse om as sentrale streekrugbyspan te oorleef, is beter as wat mense dink.
Só sê Harold Verster, besturende direkteur van die Cheetahs-Maatskappy en president van die Vrystaatse rugbyunie (VRU), in reaksie op gerugte oor ’n moontlike samesmelting tussen die Southern Kings en die Cheetahs in 2013.
Sport24 verneem een van die baie keuses wat die Suid-Afrikaanse Rugbyunie (Saru) het, is om dié twee spanne as ’n streekspan vir Super-rugby te laat saamsmelt. Saru moet oor twee jaar vir die Kings plek maak en dié aangeleentheid word vroeg aanstaande jaar bespreek.
Volgens Verster het die Cheetahs ’n sterk saak om ’n franchise te bly en hy het sprake van ’n samesmelting ontken. “Daar is baie onsekerheid oor 2013. Die kanse dat die Cheetahs sal oorleef, is beter as wat mense dink. Daar is geen sprake dat ons en die Kings gaan saamsmelt nie.”
Hy sê die Cheetahs bestaan uit drie unies – die Griffons, Griekwaland-Wes en die Vrystaat – en is eintlik die enigste ware Suid-Afrikaanse streekspan.
Die Cheetahs het die afgelope paar jaar ’n hele paar spelers van die Poubloues gebruik, terwyl ander plaaslike franchises feitlik dieselfde spelers as in die Curriebeker-reeks gebruik het.
Verster sê daar is slegs een franchise wat die sentrale deel van Suid-Afrika verteenwoordig, terwyl die Bulls en die Lions byvoorbeeld na aan mekaar is.
Hy meen ook die Noord-Kaapse- en Vrystaatse regering staan bankvas agter die Cheetahs.
Sport24 verneem Saru het ’n paar keuses wat die Kings betref. ’n Nuwe tenderproses vir streke wat Suid-Afrika verteenwoordig, kan volg. Dit kan ook tot die herindeling van streke lei. Die plaaslike span wat outomaties uitval as hy aanstaande jaar laaste eindig; of promosie en relegasie ná aanstaande jaar se reeks, waar die onderste Suid-Afrikaanse span op die puntelys vir die Kings plek maak, kan ook oorweeg word.
Volgens Verster is dit logisties onmoontlik vir die Kings en die Cheetahs om saam te speel. “Daar is min vlugte tussen Bloemfontein en Port Elizabeth en ’n mens kan ook nie elke keer sowat 650km ver ry nie.
“Ons het voorheen saam met die Leeus vir die Cats gespeel, maar dit het vanweë logistieke probleme nie gewerk nie.”
Vir die jongste sportnuus volg Nuus24Sport op Twitter.
– Sport24