Kaizer Chiefs kondig rugbyspan aan

2012-10-29 15:15

Soweto – Suid-Afrika se gewildste sokkerspan, Kaizer Chiefs, gaan nou rugby ook ‘n kans gee.

Die Soweto-sokkerreus het ‘n span geregistreer om deel te neem aan die Premierliga-sewestoernooi wat Desember in George gehou gaan word.

Die voormalige Springbokvleuel Breyton Paulse het bevestig dat hy die span se kaptein sal wees, het EWN Sport berig.

Hy het gesê dat dit ‘n unieke manier is om sokker-ondersteuners te kry om meer van rugby te leer en dat dit ook ‘n kans is om die spel te ontwikkel.

EWN Sport het verder berig dat die voormalige Springboksenter Gcobani Bobo die Kaizer Chiefs se span sal afrig.

Die toernooi sal op 14 en 15 Desember op die Outeniquapark in George plaasvind en groot name soos Quade Cooper, Shane Williams, Brent Russell, Fabian Juries en Stefan Basson het reeds hul deelname bevestig.

Volgens die toernooi se webtuiste sal 16 spanne deelneem, met die wenspan wat met R1 miljoen se prysgeld wegstap.

– Vir die jongste sportnuus volg Nuus24Sport op Twitter.