Kaart sink Wallis
2011-12-04 09:00
Cardiff – ’n Geel kaart vir die Walliese heelagter, Leigh Halfpenny, was Saterdagdie doodsklok vir Wallis se begeerte om sy Wêreldbeker-nederlaag teen Australië te wreek.
Australië het die tuisspan hier met 24-18 pak gegee nadat Wallis ná 50 minute nog voorgeloop het.
Nadat Halfpenny gestraf is toe hy James O’Connor sonder die bal gespeel het, het drie gedoelde drieë in sy afwesigheid ’n einde gemaak aan enige sprake van ’n gedenkwaardige afskeid vir die uitstaande Wallis-vleuel Shane Williams.
Die wedstryd het lewendig begin, maar algaande in ’n skop-kompetisie ontaard. Die hardwerkende Williams was oudergewoonte indrukwekkend, maar het nie kans gekry om sy ware vir oulaas behoorlik op die toetstoneel uit te stal nie.
Hy het nietemin paslik kort voor die eindfluitjie aan die verkeerde kant opgeduik vir sy 58ste drie in 87 toetse, wat die eindtelling heel respektabel gemaak het.
Dit het aanvanklik gelyk of sy voorspelers – woes uitgedun weens beserings – sy middag lekker gaan maak. Wallis het deurentyd ingeklim en die tweestryd tussen Sam Warburton en David Pocock losbal toe was intens.
Hoewel die Wallabies hul kanse gehad het, het die tuisspan syne beter benut en kon hy met ’n voorsprong van 6-3 gaan draai.
Toe Pocock boonop weens ’n besering nie ná rustyd op die veld verskyn het nie, het dit gelyk of vetsmeer die Aussies se voorland is.
Maar Will Genia verstaan die kuns om ’n wedstryd te bestuur en hy het sy span op die voorvoet gehou, totdat Halfpenny eindelik onder druk sy fatale blaps begaan het.
Dit was die doodskoot – die Wallabies het, buiten ’n vroeë strafdoel deur O’Connor, ál hul punte behaal teen 14 spelers.
Genia, Lachie Turner en die ewe indrukwekkende Berrick Barnes het die drieë ingeryg, met O’Connor se skopvoet eindelik sekuur ná ’n vroeër gesukkel.
Vanaf 6-3 het Wallis hom skielik vasgestaar in ’n agterstand van 6-24, maar met minder as ’n kwart van die wedstryd oor, het die jong span gewys dat sy Wêreldbeker-gees nie tydelik was nie en het hulle aanhou probeer, totdat Williams se swanesang die eindtelling darem meer realisties kon maak.
Vir die jongste sportnuus volg Nuus24Sport op Twitter
– Sport24