Kaal All Black-vleuel slaan glo klante in kroeg
2011-11-14 10:45
Wellington, Nieu-Seeland – Die Nieu-Seelandse Rugbyunie (NZRU) het gesê hy sal Zac Guildford ondersteun nadat die All Black-vleuel daarvan beskuldig is dat hy twee mans in 'n kroeg in die Cook-eilande in die suidelike Stille Oseaan met die vuis geslaan het.
Jack Cooper, eienaar van Trader Jack's op die hoofeiland van Raratonga, het gesê Guildford was dronk, naak en sy voorkop het gebloei toe hy Donderdagaand daar aankom.
Cooper het gesê "hy het na een van ons klante gestap en die persoon met die vuis geslaan. Hy het toe in die kroeg rondgegaan en 'n man wat sy 60ste verjaardag gevier het, in die gesig geslaan. Hy het toe besef hy is kaal en aan almal om verskoning gevra".
Die NZRU het gesê hy sal Guildford help "as hy in die moeilikheid is" en het Maandag gevra vir "privaatheid en begrip" vir die 22-jarige speler.
Guildford het op 'n mediakonferensie tydens die Wêreldbeker-rugbytoernooi erken dat hy baie drink.
– Bly op hoogte van al die jongste sportnuus deur Nuus24Sport op Twitter te volg
- Sapa - AP