Juan gaan nié sy Bok-stewels ophang
2011-08-28 09:30
Kaapstad – Juan Smith het die vrese besweer dat hy sy laaste rugbytoets vir Suid-Afrika gespeel het.
Dié veteraan van 69 toetse, wat die Wêreldbeker-toernooi in Nieu-Seeland weens ’n haksening-besering gaan misloop, het aan Sport24 gesê dat hy nie meer planne het om sy toetsstewels ná vanjaar te bêre nie.
Smith (30) het verlede jaar op die Springbokke se toer van Brittanje en Ierland gesê dat hy beplan om toetsrugby ná vanjaar se WB-toernooi vaarwel toe te roep.
“Ek het te vinnig gepraat en ek sal graag vir nog ’n jaar of twee vir die Bokke wil speel. Hierdie jaar uit rugby het my baie ruskans gegee,” sê dié veteraan-flank.
Juan was in ’n goeie luim toe Sport24 die afgelope week met hom gesels het, maar hy is steeds hartseer dat hy nie die Bokke kan help om hul wêreldkroon te verdedig nie.
“Jy speel nie in twee WB-toernooie om ’n derde een mis te loop nie. Ons het egter steeds ’n sterk span en ek dink daar is ’n goeie kans dat Suid-Afrika dié toernooi gaan wen.
“Ek glo nie ek sal ooit oor die teleurstelling kom dat ek dit gaan misloop nie, maar ek is nie ’n ou wat myself jammer kry nie. Jy moet jou denkrigting skuif en jou met iets buite rugby besig hou. Ek bestee tyd aan my skaapboerdery.”
Nieu-Seeland is wéér die oorweldigende gunsteling om die WB-toernooi te wen en staan moontlik breed in Suid-Afrika se pad in die halfeindronde. Tog meen Smith die Bokke behoort as gunsteling beskou te word.
“Dis verbasend dat daar van die All Blacks as die gunsteling gepraat word. Hulle vaar goed in die Drienasiesreeks, maar hulle kon in vorige WB-toernooie nie die druk hanteer nie.
“Ek glo ons is saam met Australië die gunsteling. Ons hét spelers met die temperament en ervaring vir dié toernooi.”
Juan vra Suid-Afrikaners ook om agter die Bokke se kaptein, John Smit, te staan.
Smit ding met Bismarck du Plessis om die haker-posisie mee – en Juan meen dit word as ’n groter kwessie uitgemaak as wat dit werklik binne spanverband is.
“Jy kan nie John se ervaring weggooi nie. Albei bied geweldig baie vir die span. Ek dink albei is professioneel genoeg om te sien wat die beste vir die span is.
“Daar is onnodige kritiek teenoor John. Sy lynstane en skrumwerk is baie goed wanneer hy op haker is. John het baie vir Suid-Afrika gedoen en dis hartseer as ’n land so teen ’n speler draai. Ek sal wil sien dat mense agter hom staan.”
Juan sê wél dat Bismarck tans “bogemiddelde goeie rugby” speel.
Die Bok-groep is wel deurspek met ervare spelers en etlike senior spelers wat leiding kan gee.
“Dís waarom dit so lekker is om vir die span te speel. Dis belangrik vir ’n span om verskeie leiers op die veld te hê. John is vir ons die oorkoepelende leier.”
– Sport24
– Bly op hoogte van al die jongste sportnuus deur Nuus24Sport op Twitter te volg