Juan Smith mik na 2013

2012-09-19 11:48

Kaapstad – Die losvoorspeler van die Cheetahs Juan Smith, hoop om in 2013 ‘n suksesvolle terugkeer na rugby te maak.

Die Springbok-veteraan sukkel om van 'n haksening-besering te herstel wat hy twee jaar gelede tydens die Super-reeks opgedoen het.

Die Vrystater het laas vir die Springbokke in 2010 gespeel en het besluit om die 2012-seisoen mis te loop om sodoende meer op sy rehabilitasie te fokus.

"Ek wil nie te veel druk op myself plaas nie," het Smith in 'n onderhoud aan die keo-webtuiste gesê.

"Op hierdie stadium konsentreer ek net op my rehabilitasie. Ek het ook met 'n loopbaan in die korporatiewe wêreld begin wat my besig hou."

"My doelwit is om 'n terugkeer te maak vir die Cheetahs in aanstaande jaar se Super-reeks, maar ons sal kyk hoe die dinge gaan. Ek vat dit een dag op 'n slag."

Die Springbokke sukkel vanjaar met beserings, veral onder die losvoorspelers.

Alhoewel Smith in Julie sy 31ste verjaardag gevier het, hoop hy steeds om toetsrugby te speel.

"Om vir die Bokke uit te draf is beslis nog een van my doelwitte. Ek sal myself moet bewys wanneer ek gereed is."

Smith het sy internasionale debuut in 2003 gemaak en het in 63 toetse vir die Springbokke gespeel.

Vir die jongste sportnuus volg Nuus24Sport op Twitter.

– Keo