Jong stut sterf ná hy kop by partytjie stamp
2012-09-11 09:18
Johannesburg – 'n Rugbyspeler aan die Universiteit van Johannesburg (UJ) en oud-leerling van Grey Kollege in Bloemfontein, Roché van der Westhuizen, is dood nadat hy sy kop by 'n partytjie gestamp het.
Van der Westhuizen (24), wat Maandag 'n professionele kontrak sou teken en vir UJ se tweede span uitgedraf het, is Saterdagaand in sy slaap dood nadat hy by 'n trappie geval en sy oogbank teen 'n muur oopgekloof het, het Beeld Dinsdag berig.
Volgens sy broer, Quintus van der Westhuizen (34), het Roché saam met vriende uitgegaan om die span se oorwinning in 'n wedstryd, wat vroeër die dag gespeel is, te vier.
Nadat hy sy kop gestamp het, het die groep vriende wegneem-etes gekry en teruggery na hul studentehuis in Northcliff.
"Hy het aan die slaap geraak en nooit weer wakker geword nie...ons is nie seker wat die oorsaak van sy dood is nie en sal moet wag vir die uitslag van die nadoodse ondersoek. Dit is 'n absolute fratsongeluk," het Van der Westhuizen gesê.
Paul Flanagan, afrigter van die Grens-Bulldogs, het bevestig dat Roché Maandag 'n kontrak met die span sou teken.
"Ons het hom reeds vir 'n geruime tyd dopgehou. Dit is ongelooflik tragies dat iets soos hierdie met so 'n belowende jong speler moes gebeur," het hy gesê.
Volg Nuus24 op Twitter.
- SAPA
