Jonah Lomu wag vir 'n nuwe nier
2012-08-22 12:20
Parys – Die All Black-legende Jonah Lomu, wat onlangs twee keer gehospitaliseer is vir nierversaking, het in 'n onderhoud met 'n Franse koerant gesê hy sal binnekort 'n tweede nieroorplanting benodig.
"Ek probeer om so normaal moontlik te leef met die wete dat ek dalk weer 'n oorplanting moet kry. Ek ontvang drie keer 'n week dialise," het die 37-jarige aan die Le Figaro-koerant gesê.
Die voormalige All Black-vleuel, wat in 1995 met nierversaking gediagnoseer is, het agt jaar gelede 'n oorplanting ondergaan en verlede jaar in September weer siek geword. Hy was vir twee weke in die hospitaal.
Mediese toetse het onthul dat sy liggaam besig is om die nuwe nier, wat deur sy vriend, die Nieu-Seelandse radio-omroeper Grant Kereama geskenk is, verwerp en dat hy uiteindelik 'n tweede nier sal moet kry.
Lomu, 'n pa van twee, word beskou as rugby se eerste superster hoofsaaklik weens sy vertoning tydens die 1995 Wêreldbeker in Suid-Afrika.
Hy is steeds die speler met die meeste drieë in 'n Wêreldbeker-toernooi (15 in totaal en 37 drieë in 63 toetse vir die All Blacks), voordat siekte sy loopbaan kortgeknip het.
Volg Nuus24Sport op Twitter.
- Sapa - AFP
