John Mitchell sal nie rug op Leeus keer
2011-07-08 08:07
Johannesburg – “Ons kan ook deel wees van die negatiwiteit. Of ons kan besluit om op die dinge binne ons beheer te fokus – om rugbywedstryde te wen.”
Ná ’n nagmerrieweek vir die Goue Leeus Rugbyunie is dit maklik om te vergeet dat daar steeds ’n span is wat reeds liters op die oefenveld sweet in sy voorbereiding vir die Curriebeker-reeks.
Dié reeks begin volgende Vrydag op Coca-Colapark vir die Leeus wanneer hulle die Pumas pak – en Mitchell en sy afrigtingspan beplan sommer groot dinge.
Wat in die raadsale gebeur, is nie waarop die afrigter fokus nie, selfs al het hy by verskeie geleenthede vanjaar die uniebestuur gemaan om verenig te raak.
Mitchell sê die skeuring tussen die GLRU en sy vennoot, GumaTAC, het hom nie laat besluit om sy tasse te pak nie.
“Dit is die laaste ding waaraan ek dink.
“Ons moet die organisasie lei deur op ons eie taak te fokus – en dit is rugby,” sê Mitchell.
“Dit is jammer dat die verhouding (met die vennoot) beëindig is. “Maar ons moet ook onthou dat die aandeelhouer-struktuur só opgestel is dat dit (spesifiek) werwing en die ontwikkeling van amateurrugby bevorder.
“En dít is waar ek graag verandering wil sien.”
Min het intussen vir Mitchell en die unie se beste spelers verander – en hulle kan die Leeus in die regte rigting lei, deur ernstig jag op die Curriebeker te maak.
Hul nederlaag ’n week gelede met 25-28 teen die Valke in ’n vriendskaplike wedstryd is nie rede tot kommer nie, aangesien dit eintlik ’n Leeus o.21-span was wat gespeel het.
“Die Super Rugbyreeks is verby en ons wil nou voortbou op die bestendigheid wat ons in verlede jaar se Curriebeker-reeks begin skep het.
“Ons gaan ook probeer om ons diepte verder in die reeks uit te bou,” sê hy met verwysing na nóg jong spelers wat vanjaar in die reeks speelkans kan kry.
Mitchell sê die Leeus se spelersgroep is in die weke voor die Curriebeker-reeks aansienlik gesnoei.
Slegs spelers wat Super Rugby-aanspraakmakers is, gaan behou word.
GumaTAC het verlede week ná sy skeuring met die GLRU gesê die unie het tot 90 gekontrakteerde spelers, van wie sommige nie eers aan oefeninge deelneem nie.
Nog twee spelers wat voor die Curriebeker-reeks vort is, is die skrumskakel Rory Kockott en die losskakel André Pretorius wat albei in Frankryk gaan speel.
Die Leeus het geen aanwinste sedert die Super Rugby-reeks gekry nie, maar het nou oor genoeg diepte om as ’n aanspraakmaker op die Curriebeker beskou te word.
Die afwesigheid van Springbokke in spanne soos die Haaie, die Westelike Provinsie en die Blou Bulle kan die weg baan vir die Leeus en die Vrystaat-Cheetahs om hul stemme dik te maak.
Spelers wat steeds beseer is en nie volgende Vrydag teen die Pumas kan speel nie, is die vleuel Lionel Mapoe en die Nieu-Seelandse agterspeler James Kamana.
Die flank Michael Rhodes moet ook nog sy volle skorsing uitdien vir ongeoorloofde spel in ’n Super Rugby-wedstryd teen die Highlanders.
’n Speler wat nie vanjaar in die Curriebeker-reeks sal speel nie, is die stut Kevin Buys, wat sy knie op die Lions se toer na Australasië beseer het.
Vir die jongste sportnuus volg Nuus24Sport op Twitter.
– Sport24