Johan Goosen onder mes

2012-10-09 12:32

Kaapstad – Die Springbok-losskakel Johan Goosen het bevestig dat hy Dinsdag 'n operasie sal ondergaan nadat hy sy knie in die nederlaag teen die All Blacks in Soweto beseer het.

Hy het Dinsdag nog twee spesialiste besoek nadat die eerste twee dokters verskil het oor of hy onmiddellik 'n operasie moet ondergaan of nie.

Die 20-jarige Vrystater het onlangs van 'n skouerbesering teruggekeer en het met 'n gekneusde hak teen die All Blacks uitgedraf.

Goosen het Saterdag mank van die veld gestap en is deur Elton Jantjies in die eerste helfte vervang.

Die losskakel het 'n graaddrie-skeur aan sy mediale knieligamente en sal Dinsdagmiddag om 12:00 geopereer word, volgens die SA Rugby-tydskrif se inskrywing op Facebook.

Hy sal na verwagting drie maande op die kantlyn wees.

Die Springbokke pak Ierland op 10 November in Dublin gevolg deur toetse teen Skotland (17 November, Edinburg) en Engeland (24 November in Londen).

Vir die jongste sportnuus volg Nuus24Sport op Twitter.

– Sport24