Jaque verlore vir Stormers
2011-12-02 07:01
Kaapstad – Die Springbok-senter Jaque Fourie is verlore vir die Stormers en die Westelike Provinsie.
Die 28-jarige Fourie gaan volgens alle aanduidinge ’n reuse-aanbod in Japan aanvaar en hy sal nie aanstaande seisoen beskikbaar wees om vir die Stormers Super-rugby te speel nie.
Fourie speel vir die Panasonic-klub en die verwagting was dat hy einde Maart aanstaande jaar na die Kaap sou terugkeer om hom by die Stormers vir die Super-reeks aan te sluit.
Hy het egter glo ’n aanbod van nagenoeg R22 miljoen ontvang om nóg twee seisoene in Japan te bly.
Die Stormers kan hulle skielik aanstaande seisoen onder druk bevind omdat hulle reeds twee belowende senters, Johann Sadie en Tim Whitehead, aan onderskeidelik die Bulls en Sharks afgestaan het. En nou is Fourie óók vir hulle verlore.
Die WP het probeer om Sadie en Whitehead te behou, maar in die geval van Sadie was die Nuwelandse rugbybase nie bereid om soveel as die Blou Bulle vir hom te betaal nie.
Whitehead het sy tasse vir Durban gepak omdat hy onder andere met spelers soos Fourie, Jean de Villiers en Juan de Jongh om ’n plek moes meeding.
De Villiers en De Jongh lyk nou die Stormers se beste beskikbare senterpaar. ’n Besering aan enigeen van dié twee kan die Stormers in ’n benarde posisie laat.
Die gewese Sharks-senter Adrian Jacobs kan dalk nou deur die Stormers nader getrek word. Die jong JP du Plessis, wat verlede jaar in die Melbourne Rebels se groep was en vanjaar vir die WP se o.21-span gespeel het, is straks ’n keuse op buitesenter.
Die losskakel Peter Grant kan ook binnesenter speel, maar hy gaan waarskynlik eers weer van die einde van Maart af vir die Stormers beskikbaar wees. Hy speel ook tans in Japan.
Fourie se Wêreldbeker-spanmaats Fourie du Preez en Danie Rossouw sit ook hul loopbane in Japan voort.
– Sport24
– Bly op hoogte van al die jongste sportnuus deur Nuus24Sport op Twitter te volg