Ixias se agsteman voor tugkomitee
2012-02-06 09:23
Kimberley. – Die Ixias sal Maandag weet hoe lank hulle sonder hul agtsteman Juan Hugo vir die Varsityskild-rugbyreeks oor die weg moet kom.
Hugo is Donderdag in Pietermaritzburg in die Ixias se sege van 30-10 oor die Universiteit van KwaZulu-Natal (UKZN) met ’n rooikaart vir ’n gevaarlike duikslag gestraf.
Hy het die UKZN se slot Gerrit Fourie geboorvat nadat laasgenoemde een van sy spanmaats glo geskop het. Fourie het met ’n geelkaart weggekom.
Hugo moet nou Maandag by die Vrystaatse Rugbyunie (VRU) voor ’n tugkomitee verskyn en kan vir tot twee weke geskors word. Sy afwesigheid sal ’n groot slag vir die Ixias wees, want die span van die Sentrale Universiteit vir Tegnologie (SUT) moet reeds sonder die beseerde agtsteman Ruan Lombaard (liesbesering) oor die weg kom.
Hugo is in die 19de minuut van Donderdag se kragmeting afgestuur, maar die besoekers het kopgehou en uiteindelik hul eerste sege oor die Impi’s behaal.
“Ek is werklik verras met ons vertoning. Ons het ongeveer 60 minute met net 14 spelers gespeel, maar die ouens het karakter gewys en goed verdedig.
“Dit was ’n moeilike wedstryd, veral omdat ons hulle nog nooit voorheen geklop het nie. Maar ons is baie tevrede,” het die Ixias se breier, Theuns Hanekom, gister gesê.
Die Ixias het deurentyd aangeval en is uiteindelik met drie vyfpunters beloon. Hulle kon nie ’n bonuspunt verdien nie, maar Hanekom-hulle sal breed glimlag omdat hul span tans bo-aan die reeks se puntelys is.
“Die spelers is behoorlik lyfseer ná twee wedstryde so kort ná mekaar. Maar ons het twee seges gesoek en dit gekry. Ons het volgende week ’n loslootjie wat die ouens kans gee om goed uit te rus,” het Hanekom bygevoeg.
Die senter Gerrit Smith het sy dyspier teen die Impi’s beseer, terwyl Lombaard, die heelagter Charlie Hitchcock (enkel) en slot Carl Wegner (enkel) ook nog op die krukkelys is.
Dit is nog onseker of hulle op 13 Februarie tuis teen Fort Hare in aksie sal wees.
Puntemakers:
Ixias 30: Drieë: Baksteen van Heerden, Nico Steenkamp, Inus Kritzinger. Doelskoppe: Jannie Myburgh (3). Strafskoppe: Myburgh (2). Skepdoel: Myburgh. UKZN 10: Drieë: Leon Stevens, Hanno Botha.
*Wits het geen probleme ondervind nie om Fort Hare Donderdag in Johannesburg met 58-14 ore aan te sit.
Wits se vleuel Riaan Arends het twee van sy span se agt drieë gaan druk, met die losskakel Kyle Peyper wat 18 punte met sy skopvoet bygedra het.
Die vleuel Garth van Rayner het Fort Hare se enigste twee drieë gaan druk.
Puntemakers:
Wits 58: Drieë: Riaan Arends (2), Brent Crossley, Devin Montgomery, Charles Baggott, Oliver Rochat, Ruan Noeth, Heinke Hartdegen. Doelskoppe: Kyle Peyper (6). Fort Hare 14:Drieë: Garth van Rayner (2). Doelskoppe: Teboho Makhuru (2).
Vir die jongste sportnuus volg Nuus24Sport op Twitter.
– Sport24