IRR sal All Black se skorsing hersien
2012-11-15 12:21
Kaapstad – Die Internasionale rugbyraad (IRR) het Donderdag bevestig dat hy die skorsing wat aan die All Black-flank Adam Thomson opgelê is, sal hersien.
Thomson is Woensdag vir een week geskors nadat hy skuldig bevind is dat hy die Skotse speler Alasdair Strokosch tydens 'n losgemaal op die kop getrap het.
Hy sal gevolglik die naweek se wedstryd teen Italië misloop, maar is beskikbaar vir die kragmeting met Wallis.
Die slot van die Wallabies, Rob Simmons, is op dieselfde dag vir agt weke geskors nadat hy skuldig bevind is vir 'n boorvat op 'n Franse speler.
Eliota Fuimaono-Sapolu, die senter van Samoa wat met 'n skorsing van drie weke gestraf is weens uitlatings wat hy op Twitter gemaak het, het die tugproses gekritiseer.
"Ek het drie weke gekry vir sarkastiese tweets. So as ek net op 'n speler se kop getrap het, het ek slegs een week gekry? Hierdie is so komies, het Fuimaono-Sapolu gesê.
Die voormalige haker van Engeland, Brian Moore, het Thomson se skorsing as "belaglik sag" beskryf.
Brett Gosper, die IRR se uitvoerende hoof, het egter op Moore se kommentaar en soortgelyke klagtes op Twitter gereageer deur te sê: "Die IRR sal die saak hersien aangesien dit 'n wedstryd onder ons jurisdiksie was."
Vir die jongste sportnuus volg Nuus24Sport op Twitter.
– Keo
