IRR betaal R14 milj vir Poemas in Drienasies
2010-03-10 00:32
Barcelona - Die Internasionale Rugbyraad (IRR) gaan $2 miljoen (sowat R14 miljoen) betaal sodat Argentinië vanaf 2012 aan die Drienasies-reeks kan deelneem.
Bernard Lapasset, voorsitter van die IRR, het gesê 'n eenmalige betaling verwyder die laaste struikelblok wat die Poemas weerhou om aan die reeks deel te neem.
Suid-Afrika, Nieu-Seeland en Australië neem ook deel aan die Drienasies-reeks.
Lapasset het gesê die IRR moet net die ooreenkoms volgende maand by 'n vergadering bevestig.
Argentinië het derde geëindig by die 2007 Wêreldbeker, maar wou wedstryde teen opponente hoër op die ranglys speel omdat hulle geografies op die internasionale rugbykaart gestrand is.
– Sapa-AP