Huldeblyke stroom steeds in vir Jan Ellis

2013-02-09 14:50

Jan en Heila Ellis sowat tien jaar gelede. (Foto24)

Kaapstad – Huldeblyke stroom steeds in vir die Springboklegende Jan Ellis wat Vrydag in die ouderdom van 71 gesterf het.

Sangeres, verskeie rugbyspelers en aanhangers het hul medelye op sosiale netwerke gedeel.

"Dink vandag terug aan die Saterdae toe ek op oom Jan Ellis se vendusie rond gehardloop het tussen die diere en jaffels eet. #RIPlegende," het die sanger Bok van Blerk op Twitter geskryf.

Die Springbok-rugbyspeler Pierre Spies het ook sy boodskap op die sosiale netwerk gedeel.

"RIP Jan Ellis – 'n legendariese losvoorspeler vir die Springbokke. Ons medelye aan sy vriende en familie."

Die sanger Steve Hofmeyr het ook sy medelye gedeel.

"En ons maak planne om VIER BRIEWE VIR JAN ELLIS by hom uit te kry...rus in vrede my held. Dankie vir daai handtekening in '77, Jan."

Die rugbyspeler Bakkies Botha het getweet: "RIP Jan Ellis... Ware legende."

Ellis (71), die legendariese oud-Springbokflank wat lank saam met Frik du Preez die rekord vir die meeste toetse vir die Springbokke gehou het, het Vrydag ná 'n lang stryd teen beenkanker gesterf. Hy is in ’n hospies dood, berig Beeld.

Hy word oorleef deur sy vrou, Heila, twee kinders, Petro Olivier en Jan Ellis jr., en vyf kleinkinders.

– Volg Nuus24Sport op Twitter