Hoskins klop aan by regering oor Mujati

2012-11-09 08:21

Kaapstad – Oregan Hoskins, president van die Suid-Afrikaanse Rugbyunie (Saru), het aan die regering geskryf om 'n spesiale toegewing te maak oor die keuring van Brian Mujati, het Eyewitness News Sport bekend gemaak.

Vroeër is berig dat die Bokke se plan om die vaskopstut nader te trek vir hul Europese toer in die wiele gery is omdat Mujati nie 'n Suid-Afrikaanse paspoort het of in dié land bly nie.

Dit was dieselfde kwessie wat Mujati uit verlede jaar se Wêreldbeker in Nieu-Seeland gehou het.

Die radiostasie het berig dat Hoskins verlede week 'n formele brief aan die departement van sport en ontspanning gestuur het, en dat slegs die minister 'n toegewing kan maak.

Sport24 het vroeër vandeesweek berig dat die Iers-gebaseerde Heinke van der Merwe op die kortlys is as 'n moontlike plaasvervanger vir die Sprinbokke se jaareind-toer.

– Volg Nuus24Sport op Twitter