Heyneke tevrede met Bok-kampe
2012-05-03 21:07
Kaapstad – Die Springbok-afrigter, Heyneke Meyer, het Kaapstad as ‘n gelukkige man verlaat nadat hy drie baie suksesvolle beplanningskampe oor die afgelope drie weke beleef het.
Dit was Meyer se eerste interaksie met die land se voorste spelers sedert sy aanstelling aan die einde van Januarie. Twee van die drie kampe is in Pretoria gehou, met spelers van die Cheetahs, Lions, Bulls en Sharks. Die finale kamp, met spelers van die Stormers, het Donderdag hier tot ‘n einde gekom.
Meyer het ook spelers van die SA Onder 20-span betrek. Altesaam 104 spelers het die drie kampe bygewoon. Elke speler het alleen ‘n gesprek met die Springbok-afrigter gehad en is deur die mediese span geassesseer.
“Ek was regtig baie tevrede met die benadering en gewilligheid wat deur die spelers gewys is in die drie kampe,” het Meyer gesê. “Vir my is dit baie belangrik dat spelers vir Suid-Afrika wil speel en om te sien hoe gretig ons spelers is om die Groen en Goud te dra, het my werklik beïndruk.
“Ek is bewus van die waarde daarvan om ‘n ruskans te kry, veral in ‘n taai kompetisie soos Vodacom Super Rugby, maar hierdie ouens het almal betrokke geraak en het nie vir ‘n oomblik gehuiwer toe hulle gevra is om die kampe by te woon nie.
“Hul franchises het ons ook baie gehelp en ek kan hulle nie genoeg daarvoor bedank dat hulle ons tyd met die spelers toegelaat het nie. Om in die reeks teen Engeland in te gaan met die hoeveelheid basiswerk wat ons gedoen het, is iets wat ek nie voorsien het nie en dit gee my baie selfvertroue vir volgende maand.
“Dit sou altyd ‘n groot uitdaging wees om van voor af te begin met minder as ‘n week voordat ons teen die Engelse te staan kom, maar hierdie kampe het baie gehelp om van die bekommernisse wat ek gehad het, te besweer.”
- Volg Nuus24Sport op Twitter
