Hane verwag straf toets teen Bokke
2010-06-04 11:33
Parys – Die afrigter van die Franse rugbyspan, Marc Lievremont, het erken dat sy span 'n strawwe wedstryd volgende Saterdag teen die Springbokke in Kaapstad verwag.
Lievremont het tydens 'n perskonferensie gesê hy is terselfdertyd “ongeduldig én bekommerd” oor die Sesnasies-kampioene se rugbytoer na Suid-Afrika en Argentinië.
Die Franse spelers het 'n lang Europese seisoen agter die rug en verwag 'n sterker Springbok-span as die een wat die Hane verlede jaar in November met 20-13 in Toulouse geklop het.
Die breier is nietemin oortuig dat Frankryk die inspirasie sal vind wat hulle gehelp het om die Sesnasies-trofee omhoog te hou.
“Jy moet net nie vergeet dat dit aan die einde van die Suid-Afrikaners se rugbyseisoen was toe hulle verlede jaar teen ons verloor het nie,” het Lievremont gesê.
Bly op hoogte van al die jongste sportnuus deur Nuus24Sport op Twitter te volg.
- Sport24