Haaie kry versterkings
2010-09-14 14:00
Johannesburg – Goeie nuus vir die Haaie is dat twee van hul beseerde spelers, die heelagter Louis Ludik en flank Keegan Daniel, fiks sal wees vir die Curriebeker-stryd Saterdag teen die Vrystaat-Cheetahs in Durban.
Hoewel die Haaie Bismarck du Plessis en Beast Mtawarira, wat weens die Springbokke se kondisioneringsprogram nie beskikbaar is nie, se impak tydens verlede week se wedstryd teen die Pumas sou gemis het, lyk die Durbaniete steeds sterk en is hulle vol vuur.
Die Haaie lê gemaklik in die eerste posisie op die Curriebeker-punteleer, maar weet dat 'n nederlaag teen die Blikore, die Vrystaters sowel as die WP, nader na die topposisie kan bring.
Ekstra vet sal ook Saterdag op die vuur gegooi word met die Haaie en Vrystaat-Cheetahs wat tans in 'n geskil oor die dienste van die Cheetah-vleuel Lionel Mapoe gewikkel is.
Afskoptyd Saterdag is 15:00.
Bly op hoogte van al die jongste sportnuus deur Nuus24Sport op Twitter te volg.
- Sport24