Haaie behou senterpaar
2011-09-30 09:07
Die Haaie volhard met Marius Joubert en Meyer Bosman in die middelveld vir môre se Curriebeker-rugbywedstryd in Durban teen die Westelike Provinsie.
Nadat die afrigter, John Plumtree, verlede week daarop gesinspeel het dat hy Adrian Jacobs ’n kans in die beginspan teen die Streeptruie sou gee, het hy daarteen besluit voordat hy gistermiddag sy span bekend gemaak het.
Die Haaie het gister ’n stewige oefensessie gehad waartydens Plumtree die sweep hard geklap het.
Tog is dit verstommend dat daar nie aan die verbeeldinglose middelveld-kombinasie verander is nie. Joubert het nog glad nie aan die verwagtinge voldoen sedert hy hom by die Haaie aangesluit het nie en Jacobs moet wonder wat hý moet doen om ’n slag in ’n wedstryd vir die Durbaniete te begin.
Daar is net twee veranderinge aan die beginspan wat teen Griekwaland-Wes gespeel het.
Charl McLeod vervang Ross Cronjé op skrumskakel en dié blondekop is glad nie meer in die 22-tal nie. Conrad Hoffmann is nou die Haaie se skrumskakel op die plaasvervangersbank.
Voorlangs keer Ross Skeate terug as slot in die plek van Alistair Hargreaves wat ook nie op die plaasvervangersbank kon plek kry nie.
Jan-André Marais is die slot tussen die plaasvervangers.
Louis Ludik, wat die res van die seisoen uit aksie is met ’n gebreekte voet, se plek as een van die plaasvervanger-agterspelers word deur Jacques-Louis Potgieter ingeneem.
Plumtree wil hê Skeate moet ’n vurige vertoning teen sy voormalige spanmaats lewer en sodoende ook help om die vuur in die tuisspan se agttal aan te steek. Om dít te vermag, sal Kyle Cooper ook moet voortbou op sy stewige spel teen Griekwas.
Hy is een speler wat kan help om die Haaie vorentoe te laat gaan, hoewel die Kapenaars se kaptein, Tiaan Liebenberg, en Deon Fourie, wat later opgestuur kan word, twee moeilike teenstanders op haker is.
McLeod se teenwoordigheid agter die skrum kan die Haaie ook meer woema gee. Hy het juis in verlede jaar se Curriebeker-eindstryd in Durban teen die einste WP ’n uitstaande vertoning gelewer en Plumtree sal op McLeod staatmaak om die agterlyn vinnig weg te stuur.
Die twee haastige vleuels, Lwazi Mvovo en Sibusiso Sithole, moet die bal met genoeg ruimte kry om skade aan te rig. Maar om dit te laat gebeur, moet dinge in die middelveld vlot en moet Bosman en Joubert met meer vloei en deurdringingsvermoë speel.
Die Haaie-span is:
Stefan Terblanche, Sibusiso Sithole, Marius Joubert, Meyer Bosman, Lwazi Mvovo, Frederic Michalak, Charl McLeod, Keegan Daniel (k), Jean Deysel, Jacques Botes, Ross Skeate, Anton Bresler, Eugene van Staden, Kyle Cooper, Dale Chadwick.
Plaasvervangers: Monde Hadebe, Wiehahn Herbst, Jan-André Marais, Marcell Coetzee, Conrad Hoffmann, Jacques-Louis Potgieter, Adrian Jacobs.
Vir die jongste sportnuus volg Nuus24Sport op Twitter.
– Sport24