Groot slag vir Leeus voor hul GW pak
2010-07-21 10:00
Johannesburg - Die Leeus is reeds sonder Cobus Grobbelaar vir die Curriebeker-rugbyreeks, maar nou is hulle straks ook Wikus van Heerden vir die res van hul veldtog kwyt.
Van Heerden was die gunsteling om die Leeus in die afwesigheid van die beseerde Grobbelaar aan te voer, maar hy het ’n arm gebreek toe hy Saterdag vir 30 minute as plaasvervanger teen die Westelike Provinsie gespeel het.
Dit was sy eerste wedstryd terug nadat hy dieselfde arm vroeër gebreek het. Hy sal nie sommer voor Oktober weer speel nie.
Saterdag kom die Leeus in Kimberley teen Griekwas te staan, wat op hul tuisveld altyd ’n beduiwelde span is.
In 2010 het die Leeus talle van hul beste losvoorspelers verloor. Willem Alberts is vroeg vanjaar na die Haaie toe, Todd Clever het onlangs verkies om in Japan verder te gaan speel en nou is Grobbelaar en Van Heerden die nuutste verliese.
’n Reuse-taak rus nou op die ervare Franco van der Merwe se skouers as losvoorspeler en ook as kaptein, aangesien hy waarskynlik vir die res van die seisoen die span sal aanvoer.
Van der Merwe, Derick Minnie en Warren Whiteley behoort weer die lostrio teen Griekwas te wees.
Die stut JC Janse van Rensburg (enkelbesering) sal ook gemonitor word. Hy was van die min Leeus wat met eer uit die Nuweland-stryd getree het.
Boonop is stut nog ’n posisie waarin die Leeus onlangs armer geword het, met Heinke van der Merwe (Leinster) en Gert Muller (Agen) wat oorsee is.
Dit lyk ook of die Leeus se afrigter, John Mitchell, met Herkie Kruger as losskakel gaan volhard. Hoewel hy glad nie die enigste sondaar teen die WP was nie, was Kruger glad nie ’n faktor nie.
Mitchell het die belowende Elton Jantjes wel sowat 25 minute se speelkans gegee en hopelik kry hy nog blootstelling.
Griekwas sal dalk sonder die Springbok-vleuel Bjorn Basson (kniebesering) uitdraf, berig Gerdie Karstens.
Die Griekwas-span is:
Riaan Viljoen, Rocco Jansen, Wilmaure Louw, Barry Geel, Bjorn Basson/Richard Lawson, Naas Olivier (k), Sarel Pretorius, Leon Karemaker, Davon Raubenheimer, Wesley Wilkins, Cecil Kemp, Frikkie Spies, Jacobie Adriaanse, Rayno Barnes, Steph Roberts. PLAASVERVANGERS: Simon Westraadt, Albertus Buckle, Michael Passaportis/Gerhard Human/Rohan Kitshoff, Marnus Hugo, Matt Rosslee, Richard Lawson/Bertus Swanepoel.
Bly op hoogte van al die jongste sportnuus deur Nuus24Sport op Twitter te volg.
- Sport24