Griekwas sonder staatmaker wat pa word
2011-09-07 10:00
Kimberley – Die Griekwas-rugbyspan sal Vrydag in Johannesburg sy Curriebeker-kragmeting met die Goue Leeus sonder een van sy groot staatmakers, Riaan Viljoen, moet klaarkom.
Viljoen is verlof gegee om by sy vrou, Nicola, te wees wat binnekort aan hul eersteling die lewe skenk.
Dié veelsydige Springbok het verlede Saterdag in Kimberley as losskakel in sy span se nederlaag van 35-41 teen die Westelike Provinsie diens gedoen.
Hy het ook vanjaar as heelagter en vleuel in die Curriebeker-reeks vir die Poubloues uitgedraf.
Die besoekers sal ook sonder hul twee eerstekeuse-senters teen die Rooibontes moet klaarkom. Jean Stemmet het sy arm teen die WP beseer en sal waarskynlik nie oorweeg word nie.
Die binnesenter Barry Geel, wat nie teen die Streeptruie in aksie was nie, het ’n harde stamp teen die kop in sy span se kragmeting met die Vrystaat-Cheetahs opgedoen en sal waarskynlik ook nie kan speel nie.
“Dit lyk nie of Jean reg vir Vrydag se wedstryd sal wees nie, hoewel hy baie graag wil speel,” het Abré Minnie, afrigter van Griekwas gesê.
Die Leeus is die voorloper-span op die Curriebeker-puntelys en boonop op volsterkte teen die Poubloues.
Griekwas het vroeër vanjaar op sy tuisveld in Kimberley met 11-49 teen die Rooibontes die onderspit gedelf.
“Die Leeus is die voorste span in die reeks. Hulle kan hul sterkste span kies en is die gunstelinge vir die kragmeting. Die druk is dus op hulle. Ons gaan nie ekstra druk op ons plaas deur te dink ons het ’n appeltjie met hulle te skil ná ons nederlaag vroeër vanjaar nie,” het Minnie gesê.
“Ons het ons doelwitte wat ons wil bereik in die wedstryd en ons fokus net op dit,” het Minnie gesê.
Die enkelbesering van die losvoorspeler Davon Raubenheimer wek ook kommer.
Die Springbok het twee drieë teen die Westelike Provinsie gedruk en is een van die Poubloues se sleutelspelers voorlangs vir die stryd in die Goudstad.
Die slot Martin Muller se beskikbaarheid moet ook nog bevestig word. Hy sukkel met ’n maagspier-besering.
Pieter Jordaan berig dat Josh Strauss ná sy besering weer die Leeus se kapteinskap oorneem.
Dié besluit is geneem selfs al is die gereelde kaptein, Doppies la Grange, ook terug in die beginspan.
Benewens dié tweetal se terugkeer is die span verder versterk met die insluiting van Derick Minnie as flank.
Minnie is ook weens ’n besering ’n blaaskans vir sy span se wedstryd teen die Pumas gegee.
Die mees opspraakwekkende insluiting is dié van James Kamana as een van die plaasvervangers.
Kamana, ’n opwindende Nieu-Seelandse agterspeler wat hom vanjaar by die Leeus aangesluit het, het sy been op 9 April gebreek toe hy vir die Lions in die Super Rugby-reeks teen die Sharks gespeel het.
Die Goue Leeus se span is: Jaco Taute, Deon van Rensburg, Doppies la Grange, Alwyn Hollenbach, Michael Killian, Elton Jantjies, Michael Bondesio, Josh Strauss (k), Derick Minnie, Cobus Grobbelaar, Franco van der Merwe, Wikus van Heerden, Patric Cilliers, Bandise Maku, JC Janse van Rensburg.
PLAASVERVANGERS: Martin Bezuidenhout, Jacobie Adriaanse, Joe Snyman, Michael Rhodes, Warren Whiteley, Burton Francis, James Kamana.
Vir die jongste sportnuus volg Nuus24Sport op Twitter.
– Sport24