Griekwas reg om Cheetahs aan te vat
2011-10-13 10:40
Kimberley – Of dit nou kopspeletjies is en of die beseringspook werklik besluit het dit is nou die Vrystaat-Cheetahs se beurt, skeel Griekwas min in die aanloop tot dié spanne se Curriebeker-kragmeting Saterdag in Bloemfontein.
Die Vrystaters loop behoorlik onder beserings aan sleutelspelers deur en hul spanbestuur het tot gister nog veral getob oor wie losskakel gaan speel in dié belangrike buurstryd.
Griekwas ondervind nie dieselfde probleme nie en sy afrigter, Abré Minnie, het gister sonder om draaie te loop ’n onveranderde span vir die Poubloues se besoek aan die Rosestad aangekondig.
Nadat die Noord-Kapenaars die Blou Bulle verlede naweek geklop het, was daar in elk geval min ruimte vir verbetering wat die spankeuse betref.
“Ons fokus net op dit wat dié naweek van ons verwag word en steur ons nie aan wat in Bloemfontein aan die gebeur is nie,” het Minnie gister gesê.
En aan die wyse waarop die Poubloues gister geoefen het, is dit duidelik dat hulle sommer met die intrapslag hul voet op Vrystaat se gorrel wil kry – en dit daar hou.
Griekwas het alles op die oefenveld uitgehaal ter voorbereiding vir dit wat in Bloemfontein op hulle mag wag.
“Die span wat teen die Blou Bulle gespeel het, het uitstekend gevaar. Hy was baie suksesvol in die uitvoer van die wedstrydplan.
“Daarbenewens is almal wat gespeel het fiks en beskikbaar. Dit is lekker om vir ’n slag sonder beseerdes vir ’n wedstryd voor te berei,” het Minnie gesê.
Die Vrystaat mik na vyf ligapunte omdat dit ’n tuis-halfeindstryd vir hom sal verseker.
En hoewel die Poubloues wiskundig steeds ’n buitekans het om die halfeindronde te haal, is vyf punte nie die alfa en die omega vir die besoekers nie.
“Ons wil die seisoen op ’n hoogtepunt afsluit en mik na ’n sege. As ons in die proses vyf punte opraap, sal dit net ’n bonus wees,” het Minnie gesê.
George Earle, leenspeler van die Leeus, sal maar die tweede keer op slot vir die Poubloues opdraf. Hy het teen die Bulle goed met Hendrik Roodt gekombineer en kan selfs ’n kontrak by Griekwas losslaan as hy teen die Vrystaat indruk maak.
– Vir die jongste sportnuus volg Nuus24Sport op Twitter.
- Die Burger