Griekwas moet nóú bonuspunt-droogte breek
2010-07-27 09:17
Kimberley - As die Griekwas-rugbyspan aan die einde van die Curriebeker-reeks se groepfase genoeg ligapunte in die sakkie wil hê, sal die Poubloues vinnig en skielik hul bonuspunt-droogte moet afskud.
Die Noord-Kapenaars het sedert die aanvang van vanjaar se reeks nog net twee bonuspunte verwerf, waarvan net een vir vier of meer drieë in ’n wedstryd.
Griekwas het in hul eerste wedstryd – teen die Haaie – vyf drieë vir die bonuspunt-sege ingeryg, en dit met nog ’n bonuspunt vir ’n nederlaag met sewe punte of minder teen die Vrystaat-Cheetahs opgevolg.
En hoewel die Noord-Kapenaars Saterdag hier op GWK-park teen die Leeus weer op dreef gekom het, moes hulle en hul afrigter, Dawie Theron, met die minimum van vier punte vir ’n oorwinning tevrede wees.
Griekwas kon net twee drieë teen die Rooibontes druk, hoewel daar verskeie geleenthede was om ’n bonuspunt te verseker.
“Griekwas word lankal nie meer deur enige ander Curriebeker-span as ’n buiteperd vir seges beskou nie. Derhalwe berei ons teenstanders hulself noukeurig voor vir kragmetings en is hul verdedigingspatrone soveel beter. Dit maak dit aansienlik moeiliker om drieë te druk,” het Theron gister gesê.
Hy erken dat Griekwas teen die Leeus wel verskeie drieë deur hul vingers laat glip het.
“Ons het in ons video-sessie gesien hoeveel kanse daar was om nog meer drieë te druk.
“Ons afronding was steeds nie wat dit kan wees nie en sal moet aandag kry.”
Griekwas pak die Luiperds Vrydag in Potchefstroom en die besoekers sal beslis daarop uit wees om minstens vier punte teen die Noordwesters te verwerf.
Die Luiperds is altyd taai teenstanders op hul tuisveld en sal Griekwas oudergewoonte deeglik beproef.
“Daar is nie iets soos ’n maklike wedstryd in Curriebeker-rugby nie. Die Luiperds gaan ons beslis in hul visier hê. Ons sal op die dag honderd persent gefokus moet wees,” het Theron gesê.
Intussen heers kommer oor die beskikbaarheid van die Griekwas-agtsteman Leon Karemaker (enkelbesering) vir die Luiperds-stryd.
Bly op hoogte van al die jongste sportnuus deur Nuus24Sport op Twitter te volg.
- Sport24