Griekwas klop Leeus in taai stryd
2010-07-24 17:00
Anja Carstens
Kaapstad - Die span van die Griekwas moes Saterdag hard baklei vir 'n sege van 26-20 oor die Leeus in hul Curriebeker-kragmeting op die GWK-park in Kimberley.
Dit was die Leeus wat spel vroeg in die wedstryd domineer het en vir goeie aanvalswerk beloon is toe die skrumskakel Jano Vermaak en slot George Earle elk 'n drie in die eerste helfte gedruk het.
Die besoekers het teen rustyd met 14-6 voorgeloop.
In die tweede helfte was dit weer die Leeus wat eerste punte kon aanteken toe losskakel Herkie Kruger 'n strafskop deur die pale geklits het. Maar die Griekwas het teruggeveg en die stut Jacobie Adriaanse het kort daarna oorgedryf vir 'n drie.
Die manne van die Griekwas het vuur in hul agterlyn begin sit. En Bjorn Basson het in die 58ste minuut gedruk om die Griekwas met 18-17 te laat voorloop.
Pragtige hardlooprugby in die laaste tien minute van die wedstryd het aan die Leeus so byna-byna 'n derde drie besorg. Maar die Griekwas se verdediging het gehou om aan die Poubloues 'n tweede oorwinning in vanjaar se Curriebeker-seisoen te gee.
Die Leeus se volgende wedstryd is teen die Blou Bulle op Loftus Versfeld terwyl die Griekwas die Luiperds in Potchefstroom die stryd sal aansê.
Puntemakers:
Griekwas: Drieë: Jacobie Adriaanse, Bjorn Basson Doelskoppe: Naas Olivier (2) Strafskoppe: Naas Olivier (4)
Leeus: Drieë: Jano Vermaak, George Earle Doelskoppe: Herkie Kruger (2) Strafskoppe: Herkie Kruger (3)
Bly op hoogte van al die jongste sportnuus deur Nuus24Sport op Twitter te volg.
- Sport24