Graham Henry 'vermoed' knoeiery in Wêreldbeker

2012-07-29 09:36

Wellington, Nieu-Seeland –  Sir Graham Henry, voormalige afrigter van die All Blacks, het ná sy span se skok-nederlaag teen Frankryk in die kwarteindstryd van die Wêreldbeker-toernooi in 2007 wedstrydknoeiery vermoed.

Dít het aan die lig gekom in Henry se biografie, Graham Henry: Final Word, wat vandeesweek gepubliseer word.

Henry het 'n beroep op die Nieu-Seeland Rugbyunie (NZRU) gedoen om druk uit te oefen vir 'n internasionale ondersoek.

Hy het aan die biograaf Bob Howitt gesê wedstrydknoeiery is die enigste verduideliking vir die All Blacks se 20-18 nederlaag.

Henry het gesê hy het die wedstryd ontleed en hoewel hy meer as 40 potensiële oortredings deur die Franse span raakgesien het, het die Engelse skeidsregter Wayne Barnes slegs twee strafskoppe aan Nieu-Seeland toegeken. Frankryk is ook 'n drie van 'n vorentoe-aangee toegeken.

Hy het gesê dit is "onbegryplik" dat die spel geen prosedures in plek het om "bisarre" uitslae in groot wedstryde te ondersoek nie.

– Volg Nuus24Sport op Twitter

- Sapa - AP