Goue Leeus en borge Dinsdag byeen
2011-07-03 11:29
Johannesburg - Die Goue Leeus Rugbyunie (GLRU) vergader Dinsdag met hul borge in die lig van beweringe in verband met dié unie se bankrotskap en wanadministrasie die afgelope week.
Kevin de Klerk, president van die GLRU, het Saterdag aan Sport24 gesê die Leeus het niks om weg te steek nie en ontken dat hulle bankrot is.
Hy het ook beweringe van wanadministrasie verwerp.
Die sakeman Robert Gumede van die Guma-groep, en sy vennoot, Ivor Ichikowitz van die wapenvervaardigingsmaatskappy Paramount, het die afgelope week beweer die GLRU het skuld van etlike miljoene rande en dat die unie se administrasie deurmekaar is.
Gumede en Ichikowitz het einde verlede jaar ’n aandeel van 49,9% in die Leeus bekom, maar die afgelope week dié vennootskap met die GLRU beëindig omdat hulle ongelukkig is oor die wyse waarop die Gautengers hul sake bestuur.
Volgens Gumede het sy maatskappy eiehandig borgskappe van nagenoeg R100 miljoen vir die Leeus verkry.
Gumede het Vrydag op ’n perskonferensie gesê hy is nie seker of die borge wat hulle vir die Leeus bekom het, voortaan nog by die unie betrokke wil wees nie noudat die vennootskap tussen hom en die Leeus tot ’n einde gekom het.
De Klerk het by navraag aan Sport24 gesê die Leeus het geldige kontrakte met hul borge wat nie sonder meer opgeskort kan word nie.
“Ons (die GLRU) vergader Dinsdag met al ons borge en sal dan al hul moontlike vrae beantwoord.
“Ek gaan nie in die openbaar op Gumede se beweringe reageer nie. Dis nie die regte verhoog nie.
“Die Leeus het niks om weg te steek nie en ek verwerp enige aantygings van wanadministrasie.
“Die GLRU is ook nie bankrot nie en ons sal, soos altyd, oorleef,” het De Klerk gesê.
Intussen is die GLRU reeds in onderhandelinge gewikkel met ’n potensiële nuwe sakevennoot.
Die unie wou egter nie sê wie dit is nie, maar is vol vertroue dat hulle eersdaags ’n nuwe vennootskap-ooreenkoms sal kan aankondig.
Die GLRU het ook sy verbintenis tot transformasie bevestig en gesê die afgelope week se verwikkelinge sal niks verander aan die unie se visie om te transformeer nie.
- Rapport