Giteau tree uit, mik laaste hou na Deans
2012-11-07 11:02
Kaapstad – Matt Giteau het Woensdag sy uittrede uit internasionale rugby aangekondig nadat hy in onguns verval het by Australië se breier, Robbie Deans.
Die 31-jarige losskakel het 92 toetse op sy kerfstok, maar hy het sedert die Wallabies se skoknederlaag van 32-23 teen Samoa kort voor verlede jaar se Wêreldbeker-afskop, die koue skouer gekry van Deans gekry.
Giteau speel tans vir die Franse klubspan Toulon en het gekies om vir nog twee seisoene in Frankryk te bly nadat hy erken het die kanse is skraal dat hy weer vir die Wallabies sal uitdraf terwyl Deans die leisels vashou.
"Ja, ek het self my kanse verspeel om weer vir Australië te speel," het hy tydens Woensdag se aankondiging gesê.
"Maar met die breier wat tans daar is, het ek elke geval nie veel van 'n kans om weer opgeroep te word nie."
"Selfs al het ek na Australië teruggekeer, 'n voorwaarde om gekies te word vir die span, sou ek miskien nie opgeroep word nie."
"Daarom het ek besluit om by Toulon te bly, maar ek bly 'n trotse ondersteuner van die Wallabies en het steeds baie vriende in die span," het Giteau gesê.
Australië speel Saterdag in 'n toets teen Frankryk.
Vir die jongste sportnuus volg Nuus24Sport op Twitter.
- AFP
