Gesogte trofee vir Habana

2012-11-30 07:05

Johannesburg – Die Springbok-vleuel Bryan Habana se drie teen Nieu-Seeland in die Rugbykampioenskap-toernooi is as die Internasionale Rugbyspelersvereniging (Irpa) se drie van die jaar aangewys.

Habana is die tweede Suid-Afrikaner wat met dié toekenning wegstap nadat Jaque Fourie in 2009 die toekenning gewen het vir sy drie in die tweede toets teen die Britse en Ierse Leeus.

'n Paneel wat bestaan uit oud-All Black Mils Muliaina, Springbok-senter Jaque Fourie, Wallis-legende Shane Williams en Japan se Daisuke Ohata (voorste driedrukker in toetsrugby) het die wenner van die toekenning gekies.

Drie spelers wie se drieë benoem is, is All Blacks Hosea Gear en Julian Savea en die Fransman Julien Malzieu.

"Om 'n drie te druk teen die All Blacks is altyd spesiaal, maar om punte teen hulle in Nieu-Seeland aan te teken, is selfs meer spesiaal," het Habana gesê.

"Ek het dit regtig geniet om oor die doellyn in Dunedin te gaan en by te dra tot die sukses van die span en om die spangees aan te wakker.

"Om die toekenning te wen is baie spesiaal en hopelik sal ek nog vir 'n lang tyd drieë vir die Springbokke kan druk."

Vorige wenners van die toekenning:

2011 – Radike Samo (Australië) – Australië teen Nieu-Seeland

2010 – Chris Ashton (Engeland) – Engeland teen Australië

2009 – Jaque Fourie (Suid-Afrika – Suid-Afrika teen die Britse en Ierse Leeus

2008 – Brian O'Driscoll (Ierland) – Australië teen Ierland

Kyk hier na 'n video van Habana se drie:



– Volg Nuus24Sport op Twitter

- SAPA