Gehate Bryce Lawrence bêre sy fluitjie

2012-10-16 15:03

Kaapstad – Die Nieu-Seelandse skeidsregter Bryce Lawrence het sy fluitjie gebêre nadat hy Sondag in sy 200ste wedstryd in 'n kragmeting tussen Wellington en Taranaki geblaas het.

Volgens die Bay of Plenty-webtuiste is Lawrence die vierde Nieu-Seelander ná Paddy O'Brien (221 wedstryde), Paul Honiss (220) en Steve Walsh (210) om dié mylpaal te haal.

Lawrence is gedwing om sy uittrede vroeër aan te kondig ná die venynigheid oor sy hantering van die Springbokke se nederlaag teen die Wallabies tydens verlede jaar se Wêreldbeker in Nieu-Seeland.

"Dit het nogals erg begin raak," het Lawrence gesê.

"Nie regtig dreigemente aan my familie nie, al was daar kommer, maar hoofsaaklik dreigemente wat op my gemik is deur middel van sosiale media. Op Facebook het hulle selfs 'n 'Raak ontslae van Bryce Lawrence'-blad begin en dit was baie venynig."

"Dit was die absolute rede hoekom ek my loopbaan moes verander."

"Daar is vir my gesê dat ek 'n breuk sal kry ná die Wêreldbeker en ek het natuurlik aanvaar dat daar nagevolge sal wees vir 'n swak vertoning."

"Toe is daar vir my gesê dat ek in die middel van die jaar kan terugkom omdat ek onder die drie of vier beste skeidsregters in die wêreld is. Maar weens inmenging agter die skerms van unies soos Australië en Suid-Afrika het dit nie gebeur nie."

"Sanzar het my wel gebruik, maar nie in Suid-Afrika nie en mettertyd het hulle gesê dit is moeilik om my in die stelsel te hou omdat hulle die heeltyd veranderings moet maak."

Lawrence was skeidsregter in 25 toetse, twee Wêreldbeker-toernooie en 60 Super-rugbywedstryde insluitende verlede jaar se eindstryd.

Lees die volledige artikel hier.

Vir die jongste sportnuus volg Nuus24Sport op Twitter.