Geen verskonings vir Bokke se tweede helfte, sê Meyer

2012-06-17 13:46

Johannesburg – Die Springbok-breier Heyneke Meyer het gesê daar is geen verskonings vir die Springbokke se vertoning in die tweede helfte van hulle toets teen Engeland Saterdag in Johannesburg nie.

Ná 'n baie goeie vertoning in die eerste helfte moes die Springbokke in die tweede helfte ná 'n paar beserings hard stry om steeds die wedstryd te wen.

“Ek dink ons het in die eerste 40 minute by tye uitstekende rugby gespeel en dis waarheen ons wil beweeg,” het Meyer gesê.

“Ongelukkig het ons 'n paar beserings gehad, maar dit is nie 'n verskoning nie. Ek dink Engeland het regtig hulle geleenthede benut en ons het hulle 'n paar maklike drieë gegee.

“Hulle is 'n goeie span en hulle het goed gespeel in die tweede helfte.”

Willem Alberts, Juandre Kruger en Patrick Lambie is al drie in die tweede helfte beseer. Al drie spelers het in die eerste helfte 'n groot impak gemaak.

Meyer het egter gesê sy span se vertoning was 'n stap in die regte rigting.

“Ek was baie gelukkig met die paar oomblikke wat ek gesien het van die soort rugby wat ek graag wil hê ons moet speel en om vier drieë teen drie te druk op die dag... ek sal dit aanvaar.”

– Vir die jongste sportnuus, volg Nuus24 op Twitter.

- SAPA