Geen meer sissieskrums vir o.20’s
2012-01-18 10:00
Stellenbosch – Sak, Sarel!
Onbetwiste oftewel “sissieskrums” in die Internasionale Rugbyraad (IRR) se Junior Wêreldtoernooi is danksy ’n voorstel uit plaaslike geledere iets van die verlede.
Dié o.20-toernooi vind van 4 tot 22 Junie hier plaas.
Die Suid-Afrikaanse o.20-afrigter, Dawie Theron, het gister gesê die IRR het drie van sy voorstelle vir dié toernooi gunstig aanvaar, waaronder die gebruik van 23 – pleks van 22 spelers per wedstryd.
“Ek en Mervin Green van die Suid-Afrikaanse Rugbyunie was albei by die IRR se vergadering in Italië waar ons drie voorstelle ingedien het.
“Eerstens dat die rustydperk tussen wedstryde van drie tot minstens vier dae verleng word. Drie is heeltemal te min met ’n groep van 26 spelers.
“Tweedens het ons gevra waarom ons nie 23 spelers kan gebruik ten einde onbetwiste skrums uit te skakel nie.
“En derdens is ons groepgrootte van 26 tot 28 spelers verhoog. Ons is regtig gelukkig dat daar op ál die voorstelle ag geslaan is,” het Theron aan Sport24 gesê.
Die toegewing om ’n 23ste speler – ’n voorry-spesialis – te kies, maak Theron as ’n voormalige Springbok-stut baie gelukkig.
En die ekstra rusdag selfs meer só.
“Drie rusdae is regtig te min. Hoewel dit steeds tussen die drie groepwedstryde gaan geld, kry jy nóg ’n dag by as jy in die halfeindronde speel,” het Theron gesê.
Die 28 spelers maak dit ook heelwat makliker om hulle individueel te bestuur.
Volgens Theron was dit voorheen ook ’n logistieke kopseer wanneer buitelandse spanne beseerde spelers wou vervang.
“Ek moet nog besluit hoe ek die 28 gaan saamstel, maar daar sal ’n verdeling van 15-13 of 16-12 ten gunste van voorspelers wees.”
Die span speel Saterdag om 16:30 in Kaapstad teen die Ikeys.
Die Kaapse senter Pat Howard is gister vir nasionale diens opgeroep nadat Kobus van Wyk ’n spier in sy rug gerek het.
Die skrumskakel Vian van der Walt het enkelligamente geskeur.
– Vir die jongste sportnuus volg Nuus24Sport op Twitter.
– Sport24