Franse vry glo na Morné Steyn

2012-11-27 11:25

Kaapstad – Die Blou Bul- en Springbok-losskakel Morné Steyn is met 'n skuif na die Franse klubspan Stade Francais verbind.

Die Franse webtuiste Le Rugby Nistere het Dinsdag berig dat Steyn verlede week, voor die Springbokke se toets teen Engeland op Twickenham, met Stade Francais se bestuur vergader het.

Volgens berigte het die klub Steyn reeds 'n geruime tyd in hul visier.

Swak vertonings die afgelope jaar het gemaak dat hy nie meer langer Heyneke Meyer se eerstekeuse-losskakel is nie.

Steyn was op die plaasvervangerbank vir die Springbokke se eerste twee Europese toerwedstryde (Ierland en Skotland), maar is uit die 22-tal weggelaat vir die derde en laaste toets teen Engeland.

Stade Francais is tans agste op die Top14-punteleer, 'n volle 18 punte agter die voorlopers Toulon.

Vir die jongste sportnuus volg Nuus24Sport op Twitter.

– Sport24