Force-breier help Kings slyp
2011-07-06 13:22
Port Elizabeth - Die afrigter van die Western Force, Richard Graham, kuier tans in Port Elizabeth waar hy die Oostelike Provinsie-Kings met slypsessies help.
Die Kings speel Vrydagaand teen die Vrystaat in 'n vriendskaplike wedstryd by die Nelson Mandelabaai-stadion.
Graham is deur die span se afrigter, Alan Solomons, genooi om die plaaslike spelers te help slyp aan hul vaardighede.
"Dit is altyd belangrik om idees met ander afrigters uit te ruil – en ek het gedink Richard sal 'n positiewe bydra kan maak," het Solomons gesê.
Die Force-breier het Maandag by die Kings aangesluit en sal vandeesweek ook by die span se akademie uithelp.
"Ons wil dat Richard meer gereeld na Port Elizabeth toe kom sodat hy ook by van die skole in die omgewing kan afrig," het Solomons gesê.
Graham het nog net drie slypsessies met die Kings gehad sedert Dinsdagmiddag, maar is reeds beïndruk met wat hy sover gesien het.
"Eerstens is dit verfrissend om te sien dat 'n ervare afrigter soos Alan Solomans steeds bereid is om hom bloot te stel aan iets anders," het hy gesê.
"Ek kan agterkom dat hulle besig is om 'n wenkultuur te bou."
Die Force-breier het voorheen ook by Bath en Saracens afgerig. In sy speeldae het hy die Reds en Australië A verteenwoordig.
Hy was ook lank kaptein van die Wallabies se sewesspan.
Vir die jongste sportnuus volg Nuus24Sport op Twitter.
– Sport24