Flou Bokke klop Skotland

2012-11-17 18:20

Kaapstad – In 'n wedstryd vol foute en min hoogtepunte het die Springbokke Saterdag oor Skotland op Murrayfield in Edinburg geseëvier.

Suid-Afrika het die tuisspan met 21-10 geklop nadat hulle teen rustyd 14-3 voor was.

Alhoewel die Springbokke goed verdedig het en die lynstane domineer het, het hulle flou vertoon teen 'n span wat negende op die IRR se ranglys lê.

Balbesit is weggeskop en albei spanne het hopeloos te veel hanteerfoute gemaak.

Die baljagter Francois Louw is as speler van die wedstryd aangekondig.

Die Bokke se laaste toets op hul Europese toer is volgende Saterdag teen Engeland op Twickenham.

Puntemakers:

Skotland:

Drie: Henry Pyrgos Doelskop: Greg Laidlaw Stafdoele: Greg Laidlaw

Suid-Afrika:

Drie: Adriaan Strauss (2) Doelskop: Patrick Lambie Strafdoele: Patrick Lambie (3)

Vir die jongste sportnuus volg Nuus24Sport op Twitter.

– Nuus24