Engelse haker wéér vir vuilspel uitgewys
2012-12-11 10:16
Londen – Die Engelse voorspeler Dylan Hartley is vir beweerde vuilspel uitgewys tydens Northampton se nederlaag teen Ulster in 'n Europabeker-wedstryd.
Hartley is uitgewys nadat hy Ulster se haker, Rory Best, glo met sy arm geslaan het in Vrydag se kragmeting.
Die datum vir die tugverhoor moet nog bevestig word.
Die 26-jarige het eers onlangs sy terugkeer na die rugbyveld gemaak ná 'n besering, maar hy het ook wedstryde misgeloop weens dissiplinêre probleme op die veld.
Hartley is in April 2007 vir 26 weke geskors nadat hy skuldig bevind is vir oogkrappery van twee Wasps-spelers, James Haskell en Jonny O'Connor.
Dié straf het hom dieselfde jaar uit Engeland se Wêreldbeker-veldtog in Frankryk gehou.
Vroeër vanjaar is Hartley vir agt weke geskors nadat hy die Ierse flank Stephen Ferris tydens 'n Sesnasies-wedstryd op Twickenham gebyt het.
Vir die jongste sportnuus volg Nuus24Sport op Twitter.
- AFP
