Engeland skors Delon Armitage
2012-01-30 15:01
Londen – Engeland se rugbyunie (RFU) het Delon Armitage Maandag uit die Saxons-span (Engeland se A-span) geskors nadat hy in hegtenis geneem is vir beweerde aanranding.
Armitage is Sondag in Torquay in hegtenis geneem vir 'n beweerde voorval buite 'n nagklub. Hy is op borgtog vrygelaat terwyl die polisie se ondersoek voortduur.
"Ons neem kwessies rondom die gedrag van Engelse spelers baie ernstig op en het dus besluit om Delon uit die Saxons-span te skors hangende die uitslag van die polisie ondersoek," het die Engelse breier Stuart Lancaster gesê.
Armitage se klubspan London Irish, wat hom vrygestel het om 'n wedstryd vir Saxons te speel, het in 'n verklaring gesê: "London Irish is uiters teleurgesteld om te hoor van die voorval waarin Delon betrokke was. Ons verstaan heeltemal die standpunt wat die Engelse rugbyunie (RFU) oor die aangeleentheid inneem en sal ook ons eie ondersoek na die voorval loods."
Lees die volledige artikel hier.
Volg Nuus24Sport op Twitter.
– Sport24