Eng-speler in hegtenis, beboet ná aand uit

2011-12-13 18:58

Londen – Die Engelse skrumskakel Danny Care is in hegtenis geneem en beboet ná klagtes dat hy dronk en wanordelik in die openbaar was.

Die 24-jarige is Saterdagoggend in hegtenis geneem nadat hy saam met sy spanmaats van die Engelse klub Harlequins gedrink het. Harlequins het Saterdag met 21-10 teen Toulouse in 'n Heinekenbeker-groepwedstryd verloor.

Care is deur die polisie vrygelaat nadat hy 'n skulderkenningsboete van £80 (sowat R1 000) betaal het.

"Dit was 'n simpel ding om te doen – ek aanvaar dit en vra onvoorwaardelik om verskoning," het Care Maandag in 'n verklaring gesê.

Care, Engeland se tweede keuse op skrumskakel ná Ben Youngs, het vanjaar se Wêreldbeker-toernooi in Nieu-Seeland weens 'n besering misgeloop.

Harlequins, wat tans in die eerste posisie van die Engelse liga-punteleer is, het aangedui dat 'n ondersoek na die voorval geloods is.

Vir die jongste sportnuus volg Nuus24Sport op Twitter.

- SAPA