Emosie loop hoog oor Bokkies se nederlaag

2012-06-05 12:47

Kaapstad – Dawie Theron, afrigter van die Bokkies, het sy teleurstelling uitgespreek oor Suid-Afrika se skok-nederlaag van 19-23 teen Ierland in die openingswedstryd van die IRR Junior-wêreldkampioenskap in Stellenbosch Maandagaand.

"Die emosie loop steeds hoog, so 'n mens is in die versoeking om verskonings te maak," het Theron gesê.

"Dit was die klein goedjies wat ons duur te staan gekom het. Ons het goed geskrum maar ons moet gaan kyk hoekom ons vanaand verloor het."

Theron het erken die Bokkies was onder druk ná Ierland teen halftyd 13 punte teen Suid-Afrika se 3 op die telbord gehad het.

"Ons is gedwing om kanse te waag, iets wat ons nie wou doen nie," het hy gesê.

"Op die ou end was dit asof ons te versigtig was. Ons het 'n plan gehad vir hierdie wedstryd maar miskien het ons dit nie goed uitgevoer nie.

“Ons het ons bes probeer, maar dis moeilik as jy so baie foute maak soos wat ons gemaak het."

Suid-Afrika sal Saterdag teen Italië te staan kom.

– Vir die jongste sportnuus volg Nuus24Sport op Twitter.

- SAPA