'Ek's nie skuldig aan verkragting' – Kiwi-haker

2012-06-28 09:04

Kaapstad – Die haker van die Nieu-Seelandse o.20-span Nathan Harris het onthul dat hý die speler is wat ondersoek word nadat 'n Kaapstadse vrou beweer het sy is in 'n speler se hotelkamer in Kaapstad verkrag, het die Keo-webtuiste Donderdag berig.

Harris dring aan dat hy onskuldig is.

Die Nieu-Seelandse rugbyunie (NZRU) het vroeër die week bevestig dat 'n speler die aand saam met 'n 22-jarige vrou deurgebring het nadat die span teen Suid-Afrika in die eindstryd van die Junior-wêreldtoernooi op Nuweland verloor het.

Harris het Vrydag sy identiteit bekendgemaak om sodoende te verhoed dat die res van sy spanmaats verdink word.

"Ek maak die verklaring vandag sodat almal weet ek is die speler. Niemand anders is betrokke nie."

"Ek wil dit baie duidelik stel dat ek nie skuldig is aan die bewerings wat gemaak is nie. Nietemin moes ek nie 'n vrou in my hotelkamer toegelaat het nie. Dit was teen die spanreëls."

Harris het gesê hy is trots op die geleentheid om sy land te kan verteenwoordig en besef dat hy sy spanmaats en familie in die steek gelaat het deur die vrou na sy kamer te nooi.

"Daaroor is ek opreg jammer en wil om verskoning vra aan my spanmaats, die bestuurspan en aan al die ouers en vriende wat ons span ondersteun, maar veral aan my familie vir die angs en kommer wat dit veroorsaak het."

"Die afgelope vyf dae het ek baie stres verduur en ek en my gesin gaan deur 'n moeilike tyd. Ek het baie geleer en hoop vir 'n goeie uitkoms sodat ek met my lewe kan voortgaan."

"Ek kan weens die polisie-ondersoek geen verdere kommentaar lewer nie," het Harris bygevoeg.

Volg Nuus24Sport op Twitter.

– KEO