Einde van ’n era in Londen
2011-11-26 07:22
Bloemfontein – Victor Matfield hoop die Barbarians se onlangse vertoninglys sal help dat hy vandag op Twickenham ’n gepaste afskeidsgeskenk kry.
Hoewel die uitslag van ’n Baabaas-kragmeting as ’t ware van akademiese belang is, sal ’n bier beslis beter smaak as dié Springbok-strydros se rugbyspan in sy swanesang seëvier.
Matfield draf in sy vyfde Baabaas-stryd uit – dié slag die tweede keer as kaptein. Hy sal moet toesien dat spelers van 10 verkillende lande soos ’n geoliede span saamspeel om ’n sege te behaal.
Die rede: die internasionale uitnodigingspan was laas in 1976 in Cardiff met 19-7 oor die Wallabies baas.
Boonop het die Baabaas sedert die eerste kragmeting tussen dié spanne in 1948 slegs drie keer koning gekraai. Die Aussies was agt keer aan die wenkant.
Die Wallabies het die Baabaas in hul vorige kragmeting in 2009 in die Sydney Football Stadium met 55-7 afgestof.
Maar die Barbarians het in hul laaste twee wedstryde, verlede jaar teen die Bokke en in 2009 teen die All Blacks, geseëvier.
Vandag se wedstryd is vanweë verskeie redes meer besonders as die meeste Baabaas-kragmetings, en dalk tower die uitnodigingspan net genoeg op om die Aussies te ontsenu.
Dit is nie net die 34-jarige Matfield se laaste kragmeting nie, maar straks ook die einde van die vennootskap tussen die Baabaas-afrigters, Graham Henry en Steve Hansen.
Hulle het die All Blacks vanjaar tot Wêreldbeker-glorie gebrei en werk reeds sedert 2001 – toe hulle Wallis afgerig het – saam.
Hansen word as ’n gunsteling beskou om Henry by die All Blacks op te volg.
Die flank David Pocock voer die Wallabies die eerste keer aan, en James O’Connor maak sy buiging op losskakel in die beseerde Quade Cooper se afwesigheid.
O’Connor is ’n begaafde speler en kan ’n gevaar vir Cooper se plek in die Wallaby-span inhou.
Selfs Robbie Deans, die Aussies se breier, meen O’Connor kan ’n permanente draer van die Wallabies se nommer 10-trui word.
“Wie weet wat gaan in die toekoms gebeur?
“O’Connor is nog ’n speler wat die vermoë het om losskakel te kan speel en dis ’n goeie ding vir ons,” het Deans aan die webwerf www.stuff.co.nz gesê.
Die spanne is:
Barbarians: Isaia Toeava, Sam Tomkins, Robbie Fruean, Stirling Mortlock, Bryan Habana, Danny Cipriani, Peter Stringer, Adam Thomson, Mauro Bergamasco, Jerome Kaino, Victor Matfield (k), Simon Shaw, Sylvain Marconnet, Keven Mealamu, Eusebio Guinazu.
Plaasvervangers:
Adriaan Strauss, Salvatore Perugini, Jason White, Marco Bortolami, Nemia Kenatale, Richard Kahui, Seru Rabeni.
Australië: Adam Ashley-Cooper, Lachie Turner, Rob Horne, Berrick Barnes, Digby Ioane, James O’Connor, Will Genia, Ben McCalman, David Pocock, Scott Higginbotham, Nathan Sharpe, Rob Simmons, Salesi Ma’afu, Tatafu Nau, James Slipper.
Plaasvervangers:
Stephen Moore, Ben Alexander, James Horwill, Dave Dennis, Matt Hodgson, Nick Phipps, Ben Tapuai.
Afskop: 16:35
Skeidsregter: Romain Poite
– Sport24
– Vir die jongste sportnuus volg Nuus24 op Twitter.