Earl Rose kry nog 'n kans
2010-10-07 10:03
Kimberley - Griekwas het ’n tweede asem in Earl Rose se ylende Suid-Afrikaanse rugbyloopbaan geblaas.
Die Poubloues het die veelsydige agterspeler, wat verlede jaar nog
saam met die Springbokke na Europa getoer het, tot einde 2011
gekontrakteer en sodoende verhoed dat hy in die buiteland sy heil gaan
soek.
Rose sal hom reeds op 1 November by die Noord-Kapenaars aansluit en
veral op losskakel aan die span van die Diamantstad diepte verskaf.
Rose, wat vroeër vanjaar reeds by die Lions se Super14-span die
deur gewys is, is nie eers deur die Leeus-breier, John Mitchell, vir die
Curriebeker-reeks oorweeg nie en is tot onlangs nog met ’n skuif oorsee
verbind.
Die Skotse klubs Edinburgh en Glasgow Warriors het glo in sy
dienste belanggestel, maar die buksie het gister sy kontrak by die
Poubloues onderteken.
“Die skuif na Kimberley is ’n goeie geleentheid vir Earl om weer sy
voete in Suid-Afrikaanse rugby te vind. Dit sal vir hom soos ’n nuwe
begin wees,” het Rose se agent, Anthony Johnson, gister gesê.
Rose het in die verlede al hewige kritiek vir sy spelstyl en swak
dissipline verduur en net tyd sal leer of die Poubloues hierdie slag vir
hulle ’n kat in die sak gekoop het. Rose en sy jonger broer, Jody, het
nog onlangs van die Leeus se se span op die Platinum-internasionale
sewestoernooi gedros.
Intussen het Griekwas se afrigter, Dawie Theron, sy beginspan vir
Saterdag se kragmeting met die Blou Bulle op GWK-park hier bekend
gemaak.
Die Poubloues se breier het sy sterkste beskikbare span gekies, wat die erns waarmee Griekwas die wedstryd benader, beklemtoon.
Staatmakers soos Wesley Wilkins (flank), Leon Karemaker (agtsteman)
en Frikkie Spies (slot) sal teen die Ligbloues op die veld draf. Hul
teenwoordigheid sal veral voorlangs vir die tuisspan ’n pluspunt wees.
“Ons weet die Bulle speel tradisioneel baie fisiek en ons sal moet
reg wees daarvoor. Ons sal beslis met ’n fisieke benadering van ons eie
op die veld draf en veral by die afbreekpunte ’n impak moet maak,” het
Theron gesê.
Met die oog op die rol wat die Bulle-slotte Bakkies Botha en Victor
Matfield in die lynstane vertolk, het Griekwas self vandeesweek aan dié
fasset van hul spel aandag gegee.
“Ons het al teen die Matfield-Botha-kombinasie gespeel en weet wat
om te verwag. Ons lynstane was beslis een van die fokuspunte gewees. Ons
moet ons besit teen hulle verseker,” het Theron bygevoeg.
Die span: Riaan Viljoen, Rocco Jansen, Jean Stemmet, Barry Geel,
Bjorn Basson, Naas Olivier (k), Sarel Pretorius, Leon Karemaker, Wesley
Wilkins, Justin Downey, Cecil Kemp, Frikkie Spies, Jean Botha, Rayno
Barnes, Steph Roberts. PLAASVERVANGERS: Simon Westraadt, Jacobie
Adriaanse, Edwin Hewitt, Gerhard Human, Marnus Hugo, Wilmaure Louw, Rudi
Vogt.
Afskop: 15:00.
Bly op hoogte van al die jongste sportnuus deur Nuus24Sport op Twitter te volg.
- Sport24