Duikslag kelder Blits-droom
2011-11-11 07:02
Stellenbosch – Stephan Dippenaar sal nie vandag in die Blitsbok-toergroep na Australië ingesluit word nie.
Hy het gister hier sy regterenkel en -knie teen die Maties beseer.
Die Blitsbokke het ordentlike oefenwedstryde teen die Stellenbosse studente gehad.
Dippenaar se kans was goed om vandag in die toergroep na Brisbane vir die eerste toernooi in die Internasionale Rugbyraad se Sewes-wêreldreeks ingesluit te word.
Dié voormalige Blou Bul is ná ’n netjiese breekslag van die kant af gelak. Sy sy enkel en knie het sywaarts geknak.
Een van die studentetoeskouers het aan die verdediger geskree “sê jammer, Sampie”.
Maar toe Dippenaar oomblikke later van die veld af gehelp moes word, het die erns van die saak op en van die veld af duideliker geword.
Die Blitsbok-breier, Paul Treu, het aan Sport24 bevestig dat Dippenaar vir eers nie oorweeg kan word nie, maar dat die kniebesering nie so ernstig is soos aanvanklik gevrees is nie.
Die vroeë spesmaas was dat hy kruisligamente beseer het, wat hom tot nege maande lank buite aksie kon hou.
Terwyl Dippenaar vir eers tuis sal moet bly, meen Treu dié speler se seisoen is nie heeltemal daarmee heen nie.
Dit sal nou moeilik wees om die sewesgroentjie Cornal Hendricks by die huis te los wanneer die span aanstaande Vrydag na Australië vertrek.
Dié speler van die Boland-Kavaliers het Woensdag teen die Ikeys ’n paar benoude oomblikke op die verdediging beleef, maar het al daardie vrese teen die Maties besweer en behoort aanstaande week op sy eerste oorsese toer te vertrek.
Hoewel die studente gister se oefenwedstryde aanvanklik met ’n kaas-en-wyn-ingesteldheid aangepak het, het die Bokke meestal volgens hul strukture gespeel.
Maar hul fiksheid was die grootste pluspunt.
Hul kondisionerings-afrigter, Alan Temple-Jones, het die spanlede se kragte voor die wedstryde op roeimasjiene getap en hulle ook ná die wedstryde ’n paar passies laat doen.
“Ons ouens was sat nog voordat die wedstryde begin het, maar jy kon dit nie aan hul liggaamshouding agterkom nie. Ons is baie tevrede daarmee,” sê Treu.
“Omdat die wêreldreeks vanjaar met drie, pleks van die gebruiklike twee toernooie begin, sal die spanne wat deurgaans goed vertoon, ook die fiksste wees.”
– Vir die jongste sportnuus volg Nuus24Sport op Twitter.