Dubbele slag tref WP
2011-09-06 08:03
Kaapstad – 'n Dubbele slag! Dit is wat die Curriebeker-span van die Westelike Provinsie Maandag getref het met die nuus dat Duane Vermeulen waarskynlik eers volgende jaar weer mag rugby speel.
Voorts kan die losskakel Demetri Catrakilis nie vir Saterdag se wedstryd op Nuweland teen die Luiperds oorweeg word nie.
“Ek is bevrees slegte nuus van die dokter het die vreugde ná Saterdag se oorwinning oor Griekwas effens gedemp,” het Allister Coetzee, breier van die WP, Maandag aan Sport24 gesê.
“Die spesialis is glad nie tevrede met Duane se knie nie. Die grootste probleem is die been-kneusing wat dieper in die knie plaasgevind het. Vir die afsienbare toekoms is ál toegelate oefening vir hom om te loop,” het Coetzee verduidelik.
Verdere slegte nuus is dat Catrakilis ’n skeurtjie aan sy regter bisep (voorste boarm-spier) opgedoen het.
“Dis ’n reuse-jammerte dat dit juis nou gebeur het. Demetri het die afgelope naweek glad nie goed geskop nie.
“Maar hy het nou ’n gewilligheid begin wys om meer te waag – oordeelkundig, nie sommer net blindelingse opportunisme nie.
“Ons verwag van ’n losskakel om agterlangs rigting te gee, ons op die regte areas van die veld te kry, en hy het die lyn Saterdag ’n paar keer aangeval. En nou dit,” het Coetzee effens moedeloos gesê.
Ná ’n hengse lang rits beserings aan losskakels vanjaar is Catrakilis as die vyfde keuse betrek. Maar so goed het die jong Ikey ontwikkel dat hy verlede maand as die Curriebeker-speler vir Augustus aangewys is.
Coetzee-hulle sal nou op Ismaeel Dollie of Lionel Cronjé moet terugval.
Dollie oefen al ’n geruime tyd saam met die Streeptruie, terwyl Cronjé ná ’n kniebesering verlede week sy eerste veldoefensessie gehad het.
Die span vir Saterdag se wedstryd word Woensdag aangewys.
Hoewel die Luiperds laaste op die Curriebeker-puntelys lê, het Coetzee gesê daardie wedstryd bied uitdagings wat geen laksheid sal duld nie.
“In Kimberley het ons gewys dat ons nie net oor talent en vaardighede beskik nie, maar ook oor hart en gees.
“Maar daar is ’n paar tegniese goed, soos verdediging, wat beter en akkurater moet wees.
“Alleenlik wanneer jy ál jou teenstanders respekteer, sal sake nie lostorring nie en uitvoering beter wees.
“Ter wille van ons eie doelwitte is dit dus belangrik om die Luiperds met agting te benader,” het die afrigter gesê.
Vir die jongste sportnuus volg Nuus24Sport op Twitter.
– Sport24