Duane, Dewaldt lei WP in CB
2011-07-12 07:07
Kaapstad – Duane Vermeulen gaan vanjaar die Westelike Provinsie in die Curriebeker-rugbyreeks aanvoer.
Allister Coetzee, die Streeptruie se afrigter, het Maandag aangekondig dat Vermeulen (agtsteman) en die skrumskakel Dewaldt Duvenage (onderkaptein) die span sal lei.
Daar is nog onsekerheid oor wie die span Saterdag op Nuweland teen Griekwas sal aanvoer.
Vermeulen herstel nog van ’n ernstige kniebesering en sal nog tussen vier en vyf weke langs die kantlyn moet deurbring. Duvenage sukkel steeds met die beenbesering wat hom in die laaste paar weke van die Super Rugbyreeks gekniehalter het.
“Ons weet nog nie of Dewaldt gaan reg wees om Saterdag te speel nie. “Ons sal dus ons kaptein vir die beginspan teen Griekwas eers Donderdag aankondig,” het Coetzee gesê.
Die breier het bygevoeg hy is nie te bekommerd oor dié onsekerheid nie.
“Ons het ’n hele paar ouens in die groep wat spanne al in die verlede aangevoer het. Manne soos Tiaan (Liebenberg), Deon (Fourie) en Pieter Louw het sulke ervaring.”
Die afrigter het gesê die leierskap van dié en ander senior spelers is een van die WP se sterkpunte. “Jy wil altyd goeie besluitnemers in jou span hê.”
Ofskoon die WP ’n hele klomp spelers aan die Springbokke afgestaan het, is Coetzee tevrede met die diepte wat hy tot sy beskikking het.
Die slegte nuus dat Rynhardt Elstadt se beseerde knie hom drie maande op die krukkelys gaan hou, word as ’n kans vir De Kock Steenkamp beskou.
“De Kock wag al baie lank vir dié kans. Adriaan Fondse, Hilton Lobberts, Eben Etzebeth en Quin Roux is ook slotte wat beslis ’n rol kan speel,” het Coetzee gesê.
Die een posisie waarin die Kaapse span met sy diepte gesukkel het aan die einde van die Super-reeks was op losskakel. Lionel Cronjé en Kurt Coleman is nog nie reg nie, maar Gary van Aswegen sal teen Griekwas speel.
“Ons fokus het geskuif van die Superreeks na dié nuwe uitdaging. Ek dink ook nie dat ons gefaal het in vanjaar se Superreeks nie. Die Reds moes 16 jaar wag voordat hulle weer die reeks kon wen,” het Coetzee gesê.
– Sport24
– Bly op hoogte van al die jongste sportnuus deur Nuus24Sport op Twitter te volg